Özbəkistan Yazıçılar Birliyinin sədri Xalq şairi Siracəddin Seyyidin rəhbərlik etdiyi nümayəndə heyəti Gəncədə səfərdə olublar.
Bu barədə “Tehsil365” ə AMEA-dan məlumat verilib. Bildirilib ki, Əlişir Nəvai adına Özbək Dili və Ədəbiyyatı Universitetinin prorektoru professor Nurboy Cabbarov, Özbəkistan Yazıçılar Birliyinin sədr müavini Qayrat Macid, birliyin əməkdaşları Şerzod Irzayev, Ahmad Erqaşev və başqalarının daxil olduğu nümayəndə heyətinə Azərbaycan Yazıçılar Birliyinin katibi Səlim Babullaoğlu rəhbərlik edib.
Qonaqları Gəncə Şəhər İcra Hakimiyyətinin, AMEA-nın Gəncə Bölməsinin, Gəncə Nizami Gəncəvi Muzeyinin nümayəndələri qarşılayıblar. Özbəkistanlı qonaqların Azərbaycana səfərlərini Gəncə şəhərindən başlamaları təsadüfi deyil. Çünki bu yol Nizami Gəncəvinin, Əlişir Nəvainin, Heydər Xarəzminin, Məhəmməd Füzulinin, Maqsud Şeyxzadənin açdıqları nurlu, müqəddəs yoldur. Bu gün də bu yolun müasir yolçuları eyni hissiyyatla, məfkurə ilə bu ali amalı müqəddəs əmanət kimi davam etdirirlər.
Nümayəndə heyəti əvvəlcə dahi Nizami Gəncəvinin məqbərəsini, görkəmli Azərbaycan mütəfəkkiri Mir Cəlal Paşayevin ev-muzeyini ziyarət edib, Azərbaycan Yazıçılar Birliyinin Gəncə bölməsinin sədri Xəzangül Hüseynova ilə görüşüb. Gəncə səfəri Xan bağında şairə Nigar Rəfibəylinin heykəli önündə başa çatıb. Bu ziyarətlər bir daha göstərdi ki, söz adamlarının ideyaları zamanın fövqündə dayanaraq, nəsilləri bir-birinə bağlayan mənəvi körpüyə çevrilir.
Səfər çərçivəsində qonaqlar Bakıda ilk olaraq Fəxri xiyabanda Ulu Öndər Heydər Əliyevin məzarını və Şəhidlər xiyabanını ziyarət ediblər.
Daha sonra nümayəndə heyəti Azərbaycan Yazıçılar Birliyinin sədri Anarın sədrliyi ilə “Natəvan” klubunda Özbəkistan Yazıçılar Birliyinin sədri Siracəddin Seyyidin “Vaxt heykəli” kitabının Azərbaycan dilinə tərcüməsinin təqdimat mərasimində iştirak ediblər.
Tədbirdə çıxış edən Siracəddin Seyyid yüksək təşkilatçılığa, təqdimata və qonaqpərvərliyə görə Azərbaycan Yazıçılar Birliyinin sədri Anar başda olmaqla bütün iştirakçılara minnətdarlığını bildirib: “Özbəkistan ədəbi əlaqələri əbədi əlaqələrdir. Bunu deməyə o əsasım var ki, Əlişir Nəvai babamız böyük Nizamiyə çox böyük hörmət, ehtiram, etiqad bəsləyib. Bu elə bir dostluqdur ki, onu heç bir qüvvə sarsıda bilməz”.