Bu gün görkəmli heykəltaraş, Azərbaycan SSR Xalq rəssamı Tokay Həbib oğlu Məmmədovun anım günüdür.
“Tehsil365” xəbər verir ki, Tokay Məmmədov 1927-ci il iyulun 18-də Bakıda anadan olub. O, Azərbaycan təsviri incəsənətinin inkişafında mühüm xidmətlər göstərərək ölkənin tanınmış heykəltəraşlarından birinə çevrilib.
Sənətkar uzun illər ərzində bir sıra monumental və yaddaqalan əsərlərin müəllifi olub. Yaradıcılığına görə 1962-ci ildə “Azərbaycan SSR Əməkdar incəsənət xadimi”, 1973-cü ildə isə “Azərbaycan SSR Xalq rəssamı” fəxri adlarına layiq görülüb. Tokay Məmmədov həmçinin SSRİ Dövlət mükafatının laureatı olub, müxtəlif dövrlərdə ölkənin rəssamlıq və incəsənət sahəsində rəhbər vəzifələrdə çalışıb.
1970–1972-ci illərdə Azərbaycan Rəssamlar İttifaqı idarə heyətinin sədri olan sənətkar pedaqoji fəaliyyətlə də məşğul olub və professor adına layiq görülüb.
Tokay Məmmədov 2018-ci il mayın 2-də Bakıda vəfat edib. Onun yaratdığı əsərlər Azərbaycan incəsənətinin dəyərli nümunələri sırasında yer alır.