Aprelin 30-da Azərbaycan Dillər Universitetinin (ADU) İngilis və alman dilləri fakültəsi nəzdində fəaliyyət göstərən İngilis dilinin fonetikası kafedrasının təşkilatçılığı ilə Ümummilli lider Heydər Əliyevin anadan olmasının 103-cü ildönümünə həsr olunmuş “Ən yaxşı tələffüz uğrunda” adlı müsabiqənin ilk mərhələsi keçirilib.
“Tehsil365” xəbər verir ki, müsabiqənin məqsədi tələbələrin ingilis dilində düzgün və səlis tələffüz bacarıqlarının inkişaf etdirilməsi, eyni zamanda Ümummilli lider Heydər Əliyevin dövlətçilik və gənclər siyasətinə dair zəngin irsinin təbliğidir.
Tədbirdə İngilis və alman dilləri, eləcə də İngilis və fransız dilləri fakültələrinin I kurs tələbələri iştirak ediblər. İştirakçılar klassik ədəbi nümunələr əsasında çıxış edərək tələffüz, intonasiya və nitq bacarıqlarını nümayiş etdiriblər. Belə ki, müsabiqə çərçivəsində “The Ants and the Grasshopper” (Ezop), “Good Name” (Uilyam Şekspir) və “Twilight” (Corc Qordon Bayron) kimi əsərlərdən parçalar səsləndirilib.
Müsabiqə İngilis dilinin fonetikası kafedrasının müdiri dosent Xatirə Qocayeva, dosent Kifayət Alırzayeva, Cavahir Yaqubova, dos. Pərvin Musayeva və fil.f.d. Şəhla Qocayevanın iştirakı ilə qiymətləndirilib.
İlkin mərhələdə 43 tələbə arasından seçilən 15 nəfər iştirakçı 7 may tarixində keçiriləcək final mərhələsinə vəsiqə qazanıb.
Qeyd edək ki, bu cür müsabiqələrin keçirilməsi tələbələrin peşəkar dil bacarıqlarının formalaşmasına, xüsusilə fonetik kompetensiyanın inkişafına mühüm töhfə verir.
