Azərbaycan Dövlət Pedaqoji Universitetinin (ADPU) Ağcabədi filialında İctimai, təbiət fənləri və onların tədrisi texnologiyası kafedrasının təşkilatçılığı ilə “Şəhərsalma və Memarlıq İli”nə həsr olunmuş “Azərbaycanda şəhərsalma və memarlığın inkişafı: tarixdən gələcəyə” mövzusunda elmi-praktik konfrans keçirilib.
ADPU-dan “Tehsil365"ə bildirilib ki, konfransın keçirilməsində əsas məqsəd Azərbaycanda şəhərsalma və memarlıq sahəsində əldə edilmiş nailiyyətlərin elmi müstəvidə təhlili, tarixi inkişaf mərhələlərinin araşdırılması və perspektivlərin müzakirəsi olub.
Konfransı açan filialın direktoru dosent Mobil Məcidov ölkəmizdə 2026-cı ilin “Şəhərsalma və Memarlıq İli” elan edilməsi haqqında Azərbaycan Respublikası Prezidentinin Sərəncamına diqqət çəkib. Qeyd edib ki, şəhərsalma və memarlıq sahəsinin ölkənin sosial-iqtisadi inkişafında mühüm rolu var. O, ölkə rəhbərliyinin bu istiqamətdə həyata keçirdiyi dövlət siyasətinin əhəmiyyətindən danışıb. Bildirib ki, Azərbaycanın qədim memarlıq ənənələri müasir urbanizasiya prosesləri ilə uzlaşaraq yeni inkişaf mərhələsinə qədəm qoyub.
Konfransın plenar iclasında müxtəlif mövzular üzrə məruzələr dinlənilib.
“Azərbaycan şəhər infrastrukturunun tarixi və müasir xüsusiyyətləri” mövzusunda məruzə edən filialın İctimai, təbiət fənləri və onların tədrisi texnologiyası kafedrasının baş müəllimi Araz Əliyev Azərbaycanın şəhər infrastrukturunun formalaşma mərhələlərini tarixi aspektdə təhlil edərək sovet dövründən müasir dövrə qədər olan inkişaf dinamikasının elmi izahını verib. Qeyd edib ki, urbanizasiya proseslərinin sürətlənməsi şəhər infrastrukturuna olan tələbatı artırıb, bu isə bir sıra yeni çağırışların yaranmasına səbəb olub.
Filialın Pedaqogika, psixologiya və onların tədrisi texnologiyası kafedrasının baş müəllimi tarix üzrə fəlsəfə doktoru Əlizadə Nəcəfov “Qarabağ mədəniyyəti və erməni vandalizmi” mövzusunda məruzə ilə çıxış edib. O, çıxışında Qarabağın zəngin tarixi-mədəni irsindən bəhs edərək bu bölgənin Azərbaycan mədəniyyətində xüsusi yer tutduğunu vurğulayıb.
İctimai, təbiət fənləri və onların tədrisi texnologiyası kafedrasının baş müəllimi tarix üzrə fəlsəfə doktoru Anar Kərimli isə “Azərbaycan memarlığında zamanın izləri: qədimdən müasirə” mövzusunda çıxış edərək Azərbaycan memarlığının tarixi inkişaf mərhələlərini geniş şəkildə təhlil edib.
Sonra konfrans öz işini bölmələrdə davam etdirib. Üç bölmə üzrə davam edən konfransda ümumilikdə 78 çıxış dinlənilib. Çıxışlar zamanı iştirakçılar arasında fikir mübadiləsi aparılıb, mövzu ilə bağlı aktual problemlər və onların həlli yolları müzakirə olunub.