Mayın 6-dan 2026–2027-ci tədris ili üzrə ümumi təhsil müəssisələrinin birinci siniflərinə şagird qəbuluna start verilir. Bəs rus bölməsi üzrə I siniflərə şagird qəbulu müsabiqə yolu ilə aparılan ümumi təhsil müəssisələrinə (Azərbaycan və rus bölmələri üzrə Bakı Avropa liseyi, Respublika İncəsənət Gimnaziyası və Bülbül adına orta ixtisas musiqi məktəbi istisna olmaqla) qeydiyyat necə həyata keçirilir?
“Tehsil365“in Məktəbəqədər və Ümumitəhsil üzrə Dövlət Agentliyinin məlumatına istinadən verdiyi xəbərə görə, təlim dili Azərbaycan dili seçildikdə qeydiyyat ümumi qaydada aparılır. Tədris digər dildə aparılan bölmə seçildikdə isə ilk növbədə uşağın şifahi nitq bacarıqları müsahibə əsasında qiymətləndirilir.
Müsahibədən uğur qazanan valideynlər “Prioritet üzrə” bölməsini seçərək müvafiq ümumi təhsil müəssisəsinə sorğu yerləşdirə bilərlər. Prioritet hüququ olmayan valideynlər (qanuni nümayəndələr) isə elektron sistemdə “Müsabiqə yolu ilə” bölməsini seçərək övladlarının həmin təhsil müəssisəsinə qəbulu üçün müraciət edə bilərlər.
Qeyd edək ki, müsabiqələrin keçirilməsi 30 iyun – 7 iyul tarixlərini əhatə edəcək.