“Süni intellekt artıq kibertəhlükəsizlik sahəsində əsas texnologiyalardan birinə çevrilib və gələcəkdə bu sahənin istiqamətini ciddi şəkildə müəyyən edəcək. AI kibertəhlükəsizlikdə həm müdafiəni gücləndirən, həm də yeni risklər yaradan iki tərəfli texnologiyadır”.
İnformasiya texnologiyaları üzrə mütəxəssis Kamran Əsədullayev “Tehsil365”ə açıqlamasında bildirir ki, süni intellektin ən böyük üstünlüklərindən biri böyük həcmdə məlumatı real vaxt rejimində analiz edə bilməsidir. Bu da əvvəllər görünməmiş hücumların, “zero-day” zəifliklərinin və gizli təhdidlərin daha erkən aşkarlanmasına imkan yaradır.
Ekspert qeyd edib ki, AI yalnız təhlükəni müəyyən etmir, eyni zamanda ona avtomatik reaksiya da verir:
“Şübhəli IP ünvanlarının bloklanması, infeksiyaya yoluxmuş cihazların şəbəkədən ayrılması, zərərli faylların karantinə alınması və hadisələrin prioritetləşdirilməsi artıq mümkün hala gəlib.”
Kamran Əsədullayev əlavə edib ki, süni intellekt istifadəçi davranışlarını analiz etməklə daxili risklərin də qarşısını ala bilir:
“İstifadəçilərin qeyri-adi saatlarda sistemə giriş etməsi, böyük həcmdə məlumat yükləməsi və ya fərqli ölkədən daxilolma cəhdləri risk kimi qiymətləndirilir.”
Onun fikrincə, AI zərərli proqramların aşkarlanmasında da mühüm rol oynayır:
“Ənənəvi antivirus proqramları yalnız məlum virusları tanıyır. Süni intellekt isə proqram davranışını və kod strukturlarını analiz edərək yeni və dəyişdirilmiş zərərli proqramları da aşkar edə bilir.”
Mütəxəssis süni intellektin riskli tərəflərinə də diqqət çəkib:
“Kibercinayətkarlar da AI-dan istifadə edir. Daha real phishing məktubları, deepfake texnologiyası ilə saxta səs və videolar, avtomatlaşdırılmış hücum botları artıq ciddi təhlükəyə çevrilib.”
Kamran Əsədullayev bildirib ki, gələcəkdə süni intellekt proaktiv təhlükəsizlik sistemlərinin əsasını təşkil edəcək:
“AI keçmiş hücumları analiz edərək gələcək riskləri proqnozlaşdıra, zəif nöqtələri öncədən müəyyən edə və hücum baş verməmişdən əvvəl müdaxilə edə bilər.”
Sonda ekspert vurğulayıb ki, ən effektiv model süni intellektlə insan təcrübəsinin birgə istifadəsidir:
“Sürət, dəqiqlik və avtomatlaşdırma baxımından AI çox güclüdür. Lakin insan təcrübəsi ilə birlikdə istifadə olunduqda daha təhlükəsiz və səmərəli nəticə verir.”