“Bu gün jurnalistika rəqəmsal dünyada yoxdursa, o artıq jurnalistika deyil.Rəqəmsal bacarıqlar artıq əlavə üstünlük deyil, peşəkar fəaliyyət üçün zərurətə çevrilib. Jurnalist müasir alətləri bilmirsə, informasiya axınında rəqabət qabiliyyətini itirə bilər.” — bu fikir media nümayəndələri üçün keçirilən “Mediada rəqəmsal savadlılıq” təlimində səsləndirilən əsas mesajlardan biri oldu.
“Tehsil365” Medianews.az-a istinadən xəbər verir ki, Azərbaycan Televiziya və Radio Verilişləri QSC-nin Teleradio Akademiyası ilə İnnovasiya və Rəqəmsal İnkişaf Agentliyinin birgə əməkdaşlığı çərçivəsində keçirilən – “Mediada rəqəmsal savadlılıq” proqramının bu gün ilkin təlimi keçirildi.
Təlimdə Akademiyanın müdavimləri, müxtəlif qurum əməkdaşları və media nümayəndələri ilə yanaşı, bu sahəyə maraq göstərən qeyri-ixtisas sahibi olan gənclər də iştirak etdilər.
İnnovasiya və Rəqəmsal İnkişaf Agentliyinin Rəqəmsal səriştələrin inkişafı departamentinin baş layihə meneceri Zəhra Əmrahova çıxışında bildirdi ki, “Bu gün informasiya məkanında sürətli olmaq qədər, doğru məlumatı seçmək və yoxlamaq da əsas bacarıqdır. Rəqəmsal savadlılıq jurnalistin peşəkar məsuliyyətinin ayrılmaz hissəsinə çevrilib.”
O həmçinin vurğuladı ki, “Süni intellekt jurnalisti əvəz etmək üçün yox, onun işini daha operativ və səmərəli etmək üçün vasitədir. Əsas məsələ bu alətlərdən düzgün istifadə etməyi bacarmaqdır.”
Təlimçi bildirildi ki, müasir jurnalist texnologiyadan istifadə etməyi bacarmalıdı. Əks halda əmək bazarında geri qalacaq.Qeyd olundu ki, hazırda işlərin:
47%-i insanlar;
30%-i insan və maşın birlikdə;
22%-i isə yalnız maşınlar tərəfindən icra olunur.
Proqnozlara görə, yaxın illərdə bu bölgü bərabərləşəcək və jurnalistlər süni intellektlə paralel işləməyə məcbur olacaqlar.
Əmrahova vurğuladı ki, 2030-cu ilə qədər 170 milyon yeni iş yaranacaq, 92 milyon iş isə aradan qalxacaq. Bu dəyişikliklər xüsusilə media sahəsində daha çox hiss olunacaq.
Eyni zamanda, təlimdə süni intellektdən istifadə zamanı saxta məlumat riski də diqqətə çatdırıldı. O jurnalistlərə hər bir məlumatı mənbə üzrə yoxlamağı tövsiyə etdi və bildirdi ki, "Rəqəmsal savadlılıq" anlayışı yalnız texnologiyadan istifadə deyil, həm də məlumatı düzgün seçmək, analiz etmək və məqsədli şəkildə tətbiq etmək bacarığını əhatə edir.
Vurğulandı ki, gələcəyin jurnalisti texnologiya ilə işləməyi bacaran, süni intellekti köməkçi vasitə kimi istifadə edən və öz yaradıcılığını qoruyan peşəkar olacaq.
Təlim interaktiv suallar və müzakirələrlə yekunlaşdı.