“Son dövrlərdə gənclər arasında emosional gərginlik, narahatlıq və daxili təzyiq hissi daha çox müşahidə olunur”.
Bu sözləri “Tehsil365”ə açıqlamasında psixoloq Arzu Fərəcova qeyd edib.Onun sözlərinə görə, gənclər bəzən öz üzərlərinə həddindən artıq yük götürür və bu da emosional yorğunluğa səbəb olur. “Davamlı gərginlik insanın həm düşüncə tərzinə, həm də davranışlarına təsir edir. Nəticədə motivasiya azalır, daxili narahatlıq isə artır,” – deyə o bildirib.
O qeyd edib ki, sosial şəbəkələrdə daim müqayisə mühiti formalaşdığı üçün gənclər özlərini daha çox təzyiq altında hiss edirlər. Bu isə öz növbəsində özgüvənə və emosional sabitliyə mənfi təsir göstərir.
Arzu Fərəcova vurğulayıb ki, bu kimi halların qarşısını almaq üçün gənclər öz gündəlik rejimlərinə diqqət etməli, istirahətə vaxt ayırmalı və emosiyalarını düzgün idarə etməyi öyrənməlidirlər. “Kiçik fasilələr vermək, sevdiyi fəaliyyətlə məşğul olmaq və açıq havada vaxt keçirmək psixoloji rahatlıq yaradır,” – deyə psixoloq əlavə edib.
Sonda psixoloq bildirib ki, emosional gərginlik uzun müddət davam etdikdə həyat keyfiyyətinə ciddi təsir göstərə bilər və bu səbəbdən erkən mərhələdə diqqət yetirilməsi vacibdir.