Qəbələdə İnklüziv yaradıcı sənətlər festivalı keçirilib

Qəbələ Dövlət Peşə Təhsil Mərkəzində İnklüziv yaradıcı sənətlər festivalı keçirilib. 

“Tehsil365“ xəbər verir ki, festival Azərbaycan Respublikasının Mədəniyyət Nazirliyinin, Qəbələ Dövlət Peşə Təhsil Mərkəzinin dəstəyi, bir sıra dövlət və tərəfdaş qurumların iştirakı ilə, "Biz Bir Ailəyik” Əlilliyi olan şəxslərə dəstək İctimai Birliyinin təşkilatçılığı ilə baş tutub.

Tədbirin məqsədi əlilliyi olan şəxslərin yaradıcılıq potensialının üzə çıxarılması, onların cəmiyyətə inteqrasiyasının gücləndirilməsi və inklüziv dəyərlərin təbliğidir.

Tədbir Dövlət Himninin səsləndirilməsi ilə başlayıb, şəhidlərin xatirəsi bir dəqiqəlik sükutla yad edilib.

Çıxışlar zamanı inklüzivliyin cəmiyyət üçün əhəmiyyəti, əlilliyi olan şəxslərin sosial həyata inteqrasiyasının vacibliyi, onların yaradıcılıq bacarıqlarının dəstəklənməsinin önəmi vurğulanıb. Həmçinin bu kimi layihələrin cəmiyyətdə bərabərlik mühitinin formalaşmasına, sosial həssas qrupların özünüifadə imkanlarının genişlənməsinə və inklüziv dəyərlərin təşviqinə töhfə verdiyi qeyd olunub.

Tədbirin bədii hissəsində əlilliyi olan şəxslər tərəfindən mahnılar ifa olunub, musiqi alətlərində çıxışlar təqdim edilib və rəqs nömrələri nümayiş etdirilib. Eyni zamanda mərkəzin tələbələri də rəqs çıxışları ilə proqramda iştirak ediblər.

Sonda fəal iştirakçılara təşəkkürnamələr təqdim olunub və xatirə şəkilləri çəkilib.