“Azərbaycanda təhsilin rəqəmsallaşması sadəcə texnoloji yenilik deyil, həm də gələcəyimiz olan gənclərin məlumatlarının qorunması məsuliyyətidir”.
Kibertəhlükəsizlik eksperti Elvin Abbasov “Tehsil365”ə açıqlamasında bildirib ki, pandemiya dövründə onlayn platformalara kütləvi keçid ölkəyə mühüm təcrübə qazandırsa da, kibertəhlükəsizliyin nə qədər həssas sahə olduğunu da açıq şəkildə göstərdi.
Ekspert qeyd edib ki, ölkə üzrə fiber-optik internet xətlərinin genişlənməsi rəqəmsal uçurumun azalmasına töhfə verir, lakin hər yeni qoşulma nöqtəsi təhlükəsizlik baxımından yeni məsuliyyət yaradır:
“Hər bir yeni bağlantı təhlükəsizlik zəncirinin bir halqasıdır. Bu zəncirin möhkəmliyi həm texniki infrastrukturdan, həm də müəllim və şagirdlərin rəqəmsal davranışından asılıdır.”
Elvin Abbasov vurğulayıb ki, bu sahədə uğur qazanmaq üçün texnologiya ilə insan amili arasında düzgün balans qurulmalıdır:
“Təkcə texniki sistemlər kifayət etmir. Müəllimlər, şagirdlər və valideynlər də rəqəmsal təhlükəsizlik qaydaları barədə məlumatlı olmalıdır.”
Onun fikrincə, gələcəkdə süni intellekt dəstəkli sistemlər təhsil sektorunda təhlükəsizliyi daha da gücləndirəcək:
“AI əsaslı sistemlər kibertəhdidləri baş verməzdən əvvəl müəyyən edərək təhsil mühitini daha etibarlı edə bilər.”
Ekspert əlavə edib ki, əsas məqsəd yalnız güclü serverlər qurmaq deyil, eyni zamanda milli rəqəmsal ekosistemi qorumaqdır:
“Elə bir sistem qurulmalıdır ki, hər bir valideyn övladının şəxsi məlumatlarının toxunulmazlığına tam əmin olsun.”
Elvin Abbasovun sözlərinə görə, belə yanaşma Azərbaycan təhsilini daha innovativ, təhlükəsiz və insan yönümlü inkişaf mərhələsinə çıxara bilər.