Süleymanov bunu gündəlik həyatdan misalla izah edib: “Avtomobil sürməyi öyrənmək bacarıqdır, amma hansısa markanı əzbərləmək əhəmiyyət daşımır. Şagird də təhsil alarkən sistemi, məntiqi başa düşərsə, verilənlər dəyişsə belə problemi həll edə bilər. Bu yanaşma həm riyazi təfəkkürü gücləndirir, həm də digər fənlərlə inteqrasiyanı təmin edir.”
Təhsil eksperti Elçin Süleymanov “Tehsil365”ə açıqlamasında bildirib ki, artıq ənənəvi əzbərləmə metodları öz aktuallığını itirib. Onun sözlərinə görə, dünyada müasir innovativ texnologiyalar tətbiq olunur və bu yanaşma şagirdlərə nəzəri bilikləri sadəcə yadda saxlamaq deyil, onları anlayaraq və tətbiq edərək öyrənmə imkanı yaradır. “Əzbərləyərək yox, anlayaraq, praktiki bacarıqlar üzərindən tədris aparılmalıdır. Müxtəlif əyləncəli, interaktiv, infoqrafikalı metodlardan istifadə olunmalı, müzakirələr və debatlar təşkil edilməlidir.”
Ekspert qeyd edib ki, şagirdlər müəllimin növbəti həftə keçəcəyi mövzunu əvvəlcədən araşdırmalı, YouTube, sosial şəbəkələr və süni intellekt imkanlarından istifadə etməlidirlər. “Sonra dərsdə müzakirələr aparılmalı, suallar verilməlidir. Təhsil nəzəriyyə və əzbər üzərində yox, tətbiq və analiz üzərində qurulmalıdır. Əgər belə olarsa, şagirdlərin öyrənməsi daha əyləncəli olar və sırf əzbər yox, məntiqi metod öyrənərlər.”
Süleymanov bunu gündəlik həyatdan misalla izah edib: “Avtomobil sürməyi öyrənmək bacarıqdır, amma hansısa markanı əzbərləmək əhəmiyyət daşımır. Şagird də təhsil alarkən sistemi, məntiqi başa düşərsə, verilənlər dəyişsə belə problemi həll edə bilər. Bu yanaşma həm riyazi təfəkkürü gücləndirir, həm də digər fənlərlə inteqrasiyanı təmin edir.”
Ekspert əlavə edib ki, dünyada elmi əyləncəli şəkildə tətbiq etmək geniş yayılıb: “Cizgi filmləri, interaktiv oyunlar, müsabiqələr yaddaşı gücləndirir və öyrənməyə müsbət təsir göstərir. Bu metodlarla smart nəsil uşaqlarının dərsə marağı artırıla bilər.”
Süleymanovun fikrincə, müasir təhsil sistemi şagirdlərə yalnız bilik ötürmək deyil, onları düşünməyə, analiz etməyə və öyrəndiklərini praktikada tətbiq etməyə yönəltməlidir. Bu yanaşma həm öyrənməni maraqlı edir, həm də gələcəkdə əmək bazarında uğurlu fərdlərin formalaşmasına şərait yaradır.