Mayın 5-də Azərbaycan Dillər Universitetində Ümummilli lider Heydər Əliyevin anadan olmasının 103-cü ildönümünə həsr olunmuş “Heydər Əliyev: Multikulturalizm və tolerantlıq ideologiyası” adlı Beynəlxalq elmi konfrans keçirilir.
“Tehsil365” xəbər verir ki, konfransın açılış mərasimindən öncə ADU-nun kollektivi Fəxri xiyabanda xalqımızın ümummilli lideri, müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə gül dəstələri qoyublar.
Sonra Ulu Öndərin ömür-gün yoldaşı, görkəmli oftalmoloq-alim, akademik Zərifə Əliyevanın xatirəsi yad edilərək məzarı üzərinə gül dəstələri düzülüb.
Görkəmli dövlət xadimi Əziz Əliyevin və tanınmış həkim-alim Tamerlan Əliyevin məzarları üzərinə də gül dəstələri qoyulub.
Qeyd edək ki, Ümummilli lider Heydər Əliyevin anadan olmasının 103-cü ildönümü həsr olunmuş “Heydər Əliyev: Multikulturalizm və tolerantlıq ideologiyası” adlı Beynəlxalq elmi konfransda müxtəlif ölkələrdən olan alimlər, tədqiqatçılar və ictimai xadimlər multikultural dəyərlərin qorunması, tolerantlıq mühitinin inkişafı və bu sahədə Azərbaycanın nümunəvi modelinin əhəmiyyəti barədə çıxışlar edəcəklər.
