Bakı Dövlət Universitetinin (BDU) Karyera və məzunlarla iş Mərkəzinin təşkilatçılığı ilə “Peşəkar gələcəyə doğru körpü” adlı növbəti ixtisaslaşmış Karyera Sərgisi keçirilir.
“Tehsil365” xəbər verir ki, tədbirin əsas məqsədi təhsil sahəsinə maraq göstərən tələbə və məzunları ölkənin aparıcı təhsil şirkətləri və müəssisələri ilə bir araya gətirərək, onların əmək bazarına daha uğurlu inteqrasiyasına dəstək verməkdir. Sərgi eyni zamanda gənclərin peşəkar bacarıqlarının inkişaf etdirilməsi, əmək bazarının tələbləri ilə yaxından tanış olmaları və gələcək karyera planlarını daha düzgün formalaşdırmaları baxımından mühüm platforma rolunu oynayır.
Açılış mərasimində çıxış edən BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev Universitetin yalnız akademik biliklərin verilməsi ilə kifayətlənmədiyini, tələbələrin real iş mühitinə hazırlanmasının əsas prioritet istiqamətlərdən biri olduğunu vurğulayıb. O qeyd edib ki, BDU ölkənin aparıcı sənaye-istehsalat müəssisələri ilə sıx əməkdaşlıq edir. Bu, həm məzunların işlə təmin olunmasında, həm də əmək bazarının tələblərinin tədris prosesinə inteqrasiyasında mühüm rol oynayır: “BDU hər il 100-dən artıq şirkətin iştirakı ilə Karyera festivalları keçirir. Bu festivallarda müxtəlif vakant yerlər və təcrübə proqramları tələbələrə təqdim olunur. Ötən tədris ilindən isə ayrı-ayrı ixtisaslar üzrə ixtisaslaşmış karyera sərgilərinin keçirilməsi qərara alınıb. Təcrübə göstərir ki, belə ixtisaslaşmış sərgilər daha effektiv təsir göstərir. BDU-da 75 ixtisas üzrə kadr hazırlığı həyata keçirilir, onların arasında müəllimlik ixtisasları önəmli yer tutur. BDU məzunları hər il müəllimlərin işə qəbulu (MİQ) imtahanlarında ən yüksək nəticələr göstərirlər. Budəfəki sərgidə təhsil sahəsində aparıcı rola malik 11 dövlət qurumu və özəl şirkət öz vakansiyalarını və təcrübə proqramlarını təklif edir. Tələbələri onlar üçün yaradılan bu imkanlardan aktiv yararlanmağa dəvət edirəm”.
Sərgi çərçivəsində iştirakçıların bilik və bacarıqlarının inkişaf etdirilməsi məqsədilə müxtəlif mövzularda seminar, infosessiya, təlim və təqdimatlar da keçirləcək.
