Azərbaycan Dillər Universitetinin (ADU) nümayəndələri Bakı şəhərinin Xəzər rayonunda Vətən uğrunda canından keçərək şəhidlik zirvəsinə ucalmış Ziya Ağayevin əziz xatirəsinə həsr olunmuş anım tədbirində iştirak ediblər.
“Tehsil365” xəbər verir ki, Zirə qəsəbəsində yerləşən Zirə Mədəniyyət Mərkəzində (EKO PARK) təşkil olunan tədbirdə şəhid ailələri, qazilər, ictimaiyyət nümayəndələri, ziyalılar və gənclərlə yanaşı, Azərbaycan Dillər Universitetinin (ADU) Filologiya fakültəsinin dekanı Aynur Budaqova, həmçinin Filologiya və BMR fakültələrinin tələbələri iştirak ediblər.
Tədbirin təşkilatçısı, şəhidin adını daşıyan nəvəsi Ziyad Ağayev çıxış edərək bildirib ki, şəhidlərin xatirəsinin yaşadılması və onların keçdiyi şərəfli həyat yolunun gələcək nəsillərə çatdırılması hər bir vətəndaşın mənəvi borcudur.
Tədbirdə çıxış edən Türk Dünyası Mədəniyyəti və İrsi Fondunun Prezidenti Aktotı Raimkulova, Xəzər rayon Ziyalılar Şurasının sədri Təvəkkül Səlimov və Zirə Cümə Məscidinin axundu Qədir Nəcəfzadə şəhidlərin qəhrəmanlığının xalqımızın yaddaşında əbədi yaşayacağını vurğulayıblar.
Qeyd olunub ki, belə anım mərasimləri gənc nəslin vətənpərvərlik ruhunda tərbiyəsində və milli-mənəvi dəyərlərin təbliğində mühüm əhəmiyyət daşıyır.
Tədbirin bədii hissəsində Azərbaycan Respublikasının Xalq Artisti Mələkxanım Əyyubova, ifaçılar Simarə İmanova və Nuriyyə Əhmədova, həmçinin Azərbaycan Mədəniyyəti sosial şəbəkə platformasının üzvləri və Azərbaycan Dövlət Mədəniyyət və İncəsənət Universitetinin tələbələri vətənpərvərlik ruhunda musiqi nömrələri təqdim ediblər.
