“Azərbaycan təhsil qanununa görə təhsil pillələri məktəbəqədər, ümumi, peşə, orta ixtisas və ali təhsil pillələrinə bölünür. Bu pillələrdə peşə təhsili məktəbdən sonrakı ilk istiqamətdir və burada əsas məqsəd müxtəlif peşə və bacarıqların öyrədilməsidir.”
Bu sözləri “Tehsil365” ə açıqlamasında , təhsil eksperti Elçin Süleymanov bildirib.
“Bununla əlaqəli Peşə Təhsili üzrə Dövlət Agentliyinin nəzdində olan peşə məktəblərində müxtəlif istiqamətlərdə məzun şagirdlər peşə vərdişlərinə yiyələnirlər. Bu formal təhsil sonrası onların sənayedə, kənd təsərrüfatında, turizmin müxtəlif sahələrində orta və yardımçı vəzifələrdə kadrlar kimi yetişib fəaliyyət göstərmələrinə imkan verən bir sənət qazandırır.Peşə təhsili müddəti qısa, spesifik bir sahəyə yönəlmiş təhsildir. Əslində kiçik işçi heyəti bu təhsillə tez bir zamanda əmək bazarına inteqrasiya olur və bu təhsili bitirənlərin, xüsusilə ən çox axtarılan peşələri öyrənənlərin iş tapma problemi olmur.Sadəcə peşə təhsilində aktual peşələr günümüzdə, məsələn, alternativ və bərpa olunan enerji ilə əlaqəli ixtisaslar, orta ixtisas təhsili və peşə təhsili məzunları üçün nəzərdə tutulur. Eyni zamanda kənd təsərrüfatı ilə əlaqəli maşın təmiri, müxtəlif xidmət, mədəni və ictimai xidmətləri təqdim edən peşələr, dərzi, kuaför, aşpaz və sair bu sahələrə daxildir. Motorist, təkər təmiri ustası, kiçik mühasibatçı və kassir kimi vəzifələr də buna aiddir. Həmçinin tibbi avadanlıqların istifadəsi ilə əlaqəli peşələr də hər zaman aktualdır və əmək bazarında bu sahələrlə bağlı elanlar daim olur.Eyni zamanda Azərbaycanda peşə təhsili Dövlət Məşğulluq Agentliyinin peşə kursları vasitəsilə də verilir və bu kurslar daha qısa müddətlidir. Yəni əlində peşə təhsilinin həm nəzəri, həm də rəsmi sənədi olan bir şəxs əmək bazarında ixtisasına uyğun iş tapmaqda daha üstün olur və fəaliyyəti daha məsuliyyətli şəkildə qurulur.