AMEA-nın Rəyasət Heyətində Ümummilli Lider Heydər Əliyevin anadan olmasının 103-cü ildönümünə həsr edilmiş “Heydər Əliyevin elm strategiyası gənc alimlərin tədqiqatlarında” mövzusunda elmi konfrans keçirilib.
“Tehsil365“ xəbər verir ki,bu barədə AMEA-dan məlumat verilib.
Konfransda çıxış edən akademik İsa Həbibbəyli bildirib ki, dünyanın hər yerində, o cümlədən ölkəmizdə XX əsr dünya siyasətinin görkəmli dövlət xadimi, Ümummilli Lider Heydər Əliyevin anadan olmasının ildönümü ilə əlaqədar silsilə tədbirlər keçirilir.
Ulu Öndər Heydər Əliyevin dünyamiqyaslı böyük şəxsiyyət və qüdrətli siyasi xadim olduğunu hər kəsin çoxdan qəbul etdiyini deyən akademik İsa Həbibbəyli nüfuzlu dövlət xadimləri, siyasətçiləri və alimlərinin Ümummilli Liderə yüksək qiymət verdiklərini söyləyib. Qeyd edib ki, bu qiymətləndirmələr arasında xüsusi diqqət çəkən fikirlərdən biri onun “tarixin gedişini dəyişə bilən lider” olması barədə deyilənlərdir və bu, Heydər Əliyevin fəaliyyətini ən dəqiq xarakterizə edən ifadələrdən biridir.
AMEA rəhbəri qeyd edib ki, ömrünü xalqına həsr edən, milləti və dövləti üçün misilsiz xidmətlər göstərən rəhbərlər heç zaman unudulmurlar və Azərbaycan xalqı da müstəqil Azərbaycanın memarı və qurucusu Heydər Əliyevin əziz xatirəsini daim ehtiramla yad edir.
Daha sonra tədbirdə AMEA-nın Rəyasət Heyəti aparatının İctimaiyyətlə əlaqələr, mətbuat və informasiya şöbəsi tərəfindən hazırlanmış Ulu Öndərin zəngin həyatını və dövlətçilik fəaliyyətini əks etdirən videoçarx nümayiş olunub.
Konfransda çıxış edən YAP Yasamal rayon təşkilatının sədri Bəxtiyar Nəbiyev bildirib ki, Ümummilli Lider Heydər Əliyev həm sovet dövründə, həm də müstəqillik illərində hakimiyyətə qayıdarkən Azərbaycanı daim sayılıb-seçilən ölkələr sırasına yüksəldib. Ötən əsrin 90-cı illərində Yeni Azərbaycan Partiyası təsis olunarkən və Ulu Öndər yenidən hakimiyyətə qayıdarkən ziyalılarımız, xüsusilə Akademiyanın alimləri bu prosesdə yaxından iştirak etmiş, dahi liderin ətrafında sıx birləşmişlər.
Milli Məclisin deputatı tarix elmləri doktoru Vasif Qafarov “Heydər Əliyevin xilaskarlıq missiyası”, AMEA-nın Rəyasət Heyəti aparatı üzrə YAP ərazi partiya təşkilatının sədri, Elm və təhsil şöbəsinin müdir müavini Vüsal Zülfüqarov “Heydər Əliyevin Azərbaycançılıq konsepsiyası və alim məsuliyyəti”, AMEA-nın Gənclər Akademiyasının sədri dosent Elmir Babayev “Sənaye transformasiyalarından innovasiya fəaliyyətinə: Heydər Əliyevin strateji baxışında Azərbaycanın inkişaf trayektoriyası”, Gənclər Akademiyasının sədr müavini Şəfa Əliyeva “Heydər Əliyev dövründə klassik ədəbi irsin dəyərləndirilməsi və ideoloji kontekst”, Elmi-kütləvi tədbirlərin təşkili departamentinin rəhbəri Orxan İsayev “Ədəbiyyatşünaslıq elminin inkişafında Heydər Əliyev siyasətinin rolu”, “Beynəlxalq Əməkdaşlıq Assosiasiyasının sədri filologiya üzrə fəlsəfə doktoru prioritetləri” və Rəqəmsal Mobillik Mərkəzinin rəhbəri Günel Əzimova “Heydər Əliyev ideyaları və gənclik: rəqəmsallaşan dünyada gənclər” mövzusunda məruzələrlə çıxış ediblər.