Albert Aqarunov Azərbaycanın müstəqilliyi və ərazi bütövlüyü uğrunda döyüşən qəhrəmanlardan biri kimi tarixə düşüb.
“Tehsil365” xəbər verir ki, O, 1969-cu il aprelin 25-də Bakıda anadan olub.
Əslən dağ yəhudisi olan Albert Aqarunov 1980-ci illərin sonlarında Sovet Ordusunda hərbi xidmət keçib. Daha sonra Bakının Suraxanı rayonunda əmək fəaliyyətinə qayıtsa da, Vətən təhlükə ilə üzləşəndə könüllü olaraq cəbhəyə yollanıb.
Birinci Qarabağ müharibəsi zamanı tank komandiri kimi böyük şücaət göstərən Albert Aqarunov döyüş yoldaşları arasında cəsurluğu ilə seçilib. O, 1992-ci il mayın 8-də Şuşa uğrunda gedən döyüşlərdə şəhid olub.
Göstərdiyi qəhrəmanlığa görə Albert Aqarunova ölümündən sonra Azərbaycanın Milli Qəhrəmanı adı verilib. Onun adı Azərbaycan xalqının yaddaşında daim yaşayır.