“Azərbaycanda iqtisadi baxımdan ən perspektivli sahələr arasında ilk növbədə neft-qaz sənayesi ilə bağlı ixtisaslar gəlir”.
Liberal İqtisadçılar Mərkəzinin sədri Akif Nəsirli “Tehsil365”ə açıqlamasında bildirib ki, neft mühəndisliyi, geofizika və enerji menecmenti kimi ixtisaslar bu sahədə yüksək əməkhaqqı və dayanıqlı tələbatla seçilir.
Ekspert qeyd edib ki, informasiya texnologiyaları sahəsi də sürətlə inkişaf edən istiqamətlərdən biridir:
“Proqram təminatı, kibertəhlükəsizlik, süni intellekt və məlumat analizi üzrə mütəxəssislərə tələbat hər il artır. Yerli və xarici şirkətlər bu sahədə peşəkar kadrlara rəqabətli şərtlər təklif edir.”
Akif Nəsirlinin fikrincə, maliyyə və bank sektoru da geniş imkanlara malikdir. Mühasibatlıq, maliyyə analizi, audit və sığorta sahələrində ixtisaslı kadrlara həm dövlət, həm də özəl sektorda ehtiyac var.
O bildirib ki, tikinti və memarlıq sahəsi ölkənin infrastruktur layihələri ilə birbaşa əlaqəlidir:
“Mülki mühəndislik, şəhərsalma və layihə idarəetməsi istiqamətlərində mühüm iş imkanları mövcuddur.”
Ekspert əlavə edib ki, turizm və qonaqpərvərlik sektoru da perspektivli sahələr sırasındadır:
“Xüsusilə Bakı və regionların inkişafı fonunda otelçilik menecmenti, turizm marketinqi və çoxdilli kommunikasiya bacarıqlarına malik mütəxəssislərə ehtiyac artır.”
Akif Nəsirli vurğulayıb ki, kənd təsərrüfatı texnologiyaları və aqrobiznes də dövlət prioritetləri sırasında yer alır. Aqronomluq, torpaqşünaslıq və aqrar iqtisadiyyat üzrə mütəxəssislər üçün investisiya və dəstək imkanları genişlənir.
Onun sözlərinə görə, hüquq və səhiyyə sahələri də sabit tələbat görür:
“Beynəlxalq ticarət hüququ, korporativ hüquq, əqli mülkiyyət sahələri ilə yanaşı, həkimlik, əczaçılıq və tibbi texnologiyalar da gələcək üçün vacib istiqamətlərdir.”