Azərbaycan Dillər Universitetinin (ADU) Şərq ölkələri üzrə regionşünaslıq kafedrasının müəllimləri, t.ü.f.d. Təranə Quluzadə və b/m Şəfəq Mustafayevanın təşkilatçılığı ilə “Memarlıq abidələrində arxeoloji tədqiqatlar” mövzusunda elmi-tədris xarakterli seminar-təlim keçirilib.
“Tehsil365” xəbər verir ki, açılış nitqi ilə çıxış edən moderator Şəfəq Mustafayeva memarlıq irsinin öyrənilməsi və mühafizəsi prosesində arxeoloji tədqiqatların fundamental elmi əhəmiyyətini vurğulayaraq qeyd edib ki, memarlıq abidələri xalqın tarixi-mədəni yaddaşını əks etdirən mühüm mənbələrdir, arxeoloji tədqiqatlar isə həmin abidələrin kompleks elmi təhlilinə, stratifik xüsusiyyətlərinin və tarixi kontekstinin müəyyənləşdirilməsinə imkan yaradır.
Təlimdə AMEA Arxeologiya və Antropologiya İnstitutunun İslam dövrü arxeologiyası şöbəsinin aparıcı elmi işçisi, tarix üzrə fəlsəfə doktoru, “Miras” Mədəni İrsin Öyrənilməsinə Kömək İctimai Birliyinin sədri Fariz Xəlilli məruzəçi qismində çıxış edib.
Qeyd olunub ki, “Şəhərsalma və Memarlıq ili” çərçivəsində təşkil olunmuş tədbirin əsas məqsədi memarlıq abidələrinin mühafizəsi prosesində arxeoloji tədqiqatların elmi-nəzəri və praktik əhəmiyyətinin təhlili, eləcə də bu sahədə akademik maarifləndirmənin gücləndirilməsi olub. Tədbir zamanı Azərbaycanın müxtəlif regionlarında - Bakı, Gəncə, Şamaxı, Naxçıvan və Şuşa şəhərlərində, eləcə də digər yaşayış məntəqələrində yerləşən memarlıq irsinin qorunması məsələləri sistemli elmi yanaşma əsasında müzakirə edilib.
Məruzəçi memarlıq abidələrinin mühafizəsinin yalnız milli hüquqi çərçivə ilə məhdudlaşmadığını, eyni zamanda beynəlxalq konvensiyalar, xartiyalar və normativ sənədlər əsasında həyata keçirildiyini vurğulayıb, arxeoloji tədqiqatların abidələrin elmi identifikasiyası, sənədləşdirilməsi və interpretasiyası baxımından mühüm metodoloji baza rolunu oynadığını qeyd edib.
Təlim interaktiv formatda davam edib, tələbələr tərəfindən ünvanlanan suallar elmi diskussiya çərçivəsində cavablandırılıb.
Müzakirələr əsasən arxeoloji tədqiqat metodologiyası, abidələrin tarixləndirilməsi və mədəni irsin mühafizəsinin aktual problemlərini əhatə edib.
