Mayın 7-də Azərbaycan Dillər Universitetində Filologiya fakültəsi nəzdində fəaliyyət göstərən Fransız dilinin fonetikası və qrammatikası kafedrasının müdiri, filologiya üzrə fəlsəfə doktoru, dosent Vəfa Mirəhməd qızı Seyidin təşkilatçılığı ilə universitetin “Qərbi Azərbaycan” Mərkəzində açıq dərs təşkil olunub. Açıq dərsdə Filologiya fakültəsinin Dil və ədəbiyyat müəllimliyi ixtisası üzrə təhsil alan 157-ci qrup tələbələri iştirak ediblər. Tədbirin əsas məqsədi tələbələrin Qərbi Azərbaycanın tarixi, mədəni və mənəvi irsi haqqında biliklərinin genişləndirilməsi, milli yaddaşın qorunması istiqamətində aparılan elmi və maarifləndirici fəaliyyətlərlə yaxından tanış edilməsindən ibarət olub.
“Tehsil365” xəbər verir ki, tədbiri giriş sözü ilə açan ADU-nun “Qərbi Azərbaycan” Mərkəzinin rəhbəri dosent Həqiqət Hacıyeva mərkəzin yaranma zərurəti, fəaliyyət istiqamətləri və qarşıda duran əsas hədəflər barədə ətraflı məlumat verib. O qeyd edib ki, mərkəzin əsas məqsədi Qərbi Azərbaycanın tarixi-coğrafi gerçəkliklərinin, zəngin mədəni irsinin, folklorunun, ədəbiyyatının və milli-mənəvi dəyərlərinin elmi əsaslarla araşdırılması, beynəlxalq akademik müstəvidə tanıdılması və gələcək nəsillərə çatdırılmasıdır.
Dosent Həqiqət Hacıyeva çıxışında vurğulayıb ki, mərkəz çərçivəsində müxtəlif elmi layihələrin, konfransların, seminarların, maarifləndirici tədbirlərin və media təşəbbüslərinin həyata keçirilməsi nəzərdə tutulur. Onun sözlərinə görə, bu fəaliyyətlər Qərbi Azərbaycan həqiqətlərinin daha sistemli şəkildə öyrənilməsinə, elmi dövriyyəyə daxil edilməsinə və gənc nəslin milli-mədəni irsə bağlılığının gücləndirilməsinə mühüm töhfə verəcək. Mərkəz rəhbəri həmçinin bildirib ki, universitetin elmi və mədəni həyatında xüsusi yer tutan bu təşəbbüs tələbələrin elmi dünyagörüşünün formalaşmasına və onların vətənpərvərlik ruhunda yetişməsinə xidmət edir.
Daha sonra çıxış edən dosent Vəfa Seyid açıq dərsin əhəmiyyətindən danışaraq qeyd edib ki, belə təşəbbüslər tələbələrin nəzəri biliklərinin praktik müstəvidə zənginləşdirilməsi baxımından xüsusi önəm daşıyır. O bildirib ki, “Qərbi Azərbaycan” Mərkəzinin fəaliyyəti yalnız tarixi keçmişin araşdırılması ilə məhdudlaşmır, o, eyni zamanda bu zəngin irsin müasir dövrdə yaşadılması, qorunması və gələcək nəsillərə ötürülməsi istiqamətində mühüm missiya yerinə yetirir. Dosent Vəfa Seyid xüsusilə vurğulayıb ki, milli yaddaşın qorunması prosesində gənclərin fəal iştirakı olduqca vacibdir və universitet mühiti bu baxımdan mühüm platforma rolunu oynayır.
Çıxışlarda xüsusi olaraq qeyd olunub ki, gənclərin milli-mənəvi dəyərlər əsasında formalaşdırılması, onların tarixi həqiqətlər barədə obyektiv məlumatlandırılması və elmi tədqiqat fəaliyyətinə təşviq edilməsi prioritet istiqamətlərdən biridir. Bu baxımdan açıq dərslərin və maarifləndirici görüşlərin təşkili tələbələrin həm akademik, həm də vətəndaşlıq mövqeyinin inkişafında mühüm rol oynayır.
Açıq dərs çərçivəsində tələbələr mərkəzdə nümayiş etdirilən Qərbi Azərbaycanın tarixi və mədəni irsini əks etdirən maddi mədəniyyət nümunələri, arxiv materialları, kitablar və digər elmi resurslarla yaxından tanış olublar. Təqdim olunan eksponatlar və nəşrlər tələbələrdə böyük maraq doğurub, onların mövzu ilə bağlı bilik və təsəvvürlərinin daha da genişlənməsinə şərait yaradıb.
Tədbirin sonunda tələbələr tərəfindən mövzu ilə bağlı fikir mübadiləsi aparılıb, onları maraqlandıran suallar cavablandırılıb və bu kimi maarifləndirici tədbirlərin davamlı keçirilməsinin əhəmiyyəti vurğulanıb. Açıq dərs iştirakçılar tərəfindən yüksək qiymətləndirilib və universitetdə milli-mədəni irsin öyrənilməsi istiqamətində həyata keçirilən fəaliyyətlərin əhəmiyyətli tərkib hissəsi kimi dəyərləndirilib.
