Bakı Dövlət Universitetinin (BDU) Tarix fakültəsinin təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr edilmiş “Dahi şəxsiyyət və müdrik lider” mövzusunda II respublika elmi konfransı keçirilib.
“Tehsil365“ xəbər verir ki,bu barədə BDU-dan məlumat verilib.
Tarix fakültəsinin dekanı tarix elmləri doktoru, professor İbrahim Zeynalov Ümummilli Lider, BDU-nun Tarix fakültəsinin dünyaşöhrətli məzunu olan Heydər Əliyevin Azərbaycan tarixində mühüm rol oynamış görkəmli şəxsiyyət, onun həyat və fəaliyyətinin gənclərimiz üçün bir örnək olduğunu bildirib. Qeyd edib ki, bu gün müstəqil Azərbaycan dövlətinin qurucusu olan Heydər Əliyevin ağır vəziyyətdən çıxardığı ölkəmiz Prezident İlham Əliyevin rəhbərliyi ilə dünyada söz sahibi olan dövlətə çevrilib. Tam suveren, güclü iqtisadiyyatı ilə dünya dövlətləri içində öz sözünü deməyə qadir, qalib Azərbaycanın yüksəlişinin əsası Ulu Öndərin uzaqgörən siyasəti ilə qoyulub. Dekan daha sonra konfrans iştirakçılarına müxtəlif elmi-tədqiqat institutları və ali təhsil müəssisələrindən konfransa daxil olan tezislər barədə məlumat verib.
BDU-nun Ümumi dilçilik kafedrasının müdiri, Azərbaycanda Atatürk Mərkəzinin direktoru, akademik Nizami Cəfərov qeyd edib ki, Ulu Öndərin həyata keçirdiyi siyasətin əsas istiqamətlərindən biri milli qürur hissinin gücləndirilməsi və milli şüurun inkişafına təkan verilməsi olub. Akademik bildirib ki, 1970-ci illər Azərbaycanın quruculuq tarixində xüsusi mərhələ təşkil edir və ölkənin dövlət suverenliyi, beynəlxalq iqtisadi əlaqələrinin genişlənməsi, dünya iqtisadiyyatına inteqrasiyası həmin dövrdə formalaşdırılmış iqtisadi potensiala əsaslanır.
Qədim dünya və orta əsrlər tarixi kafedrasının müdiri, akademik Yaqub Mahmudov çıxışında Azərbaycan tarixinin Heydər Əliyev konsepsiyasına toxunaraq bildirib ki, dövlətçilik ənənələrinin bərpası və zənginləşdirilməsi, müstəqilliyimizin möhkəmləndirilməsi, ölkənin dinamik inkişaf yoluna çıxması və beynəlxalq nüfuzunun artması məhz Ulu Öndərin uzaqgörən siyasəti nəticəsində mümkün olub. O vurğulayıb ki, Ulu Öndər müdrik rəhbərliyi, siyasi qətiyyəti və əzmkarlığı ilə müasir dövrün görkəmli siyasi xadimlərindən biri kimi tarixə düşüb və Azərbaycan xalqının Ümummilli Liderinə çevrilib.
Milli Məclisin deputatı, BDU-nun Mənbəşünaslıq, tarixşünaslıq və metodika kafedrasının müəllimi Naqif Həmzəyev çıxışında Heydər Əliyevin respublikaya rəhbərlik etdiyi ilk dövrdə həyata keçirilən islahatların tarixi əhəmiyyətindən bəhs edib. Bildirib ki, 1969-cu ildə Azərbaycanda siyasi rəhbərliyə gələn Ulu Öndər keçmiş İttifaqın xammal bazasına çevrilmiş respublika üçün yeni inkişaf strategiyası müəyyənləşdirərək qısa müddətdə mühüm nəticələr əldə edib. Onun sözlərinə görə, 1969–1982-ci illərdə respublikada milli gəlirin ümumi həcmi 2,5 dəfə, sənaye istehsalı və əmək məhsuldarlığı 2 dəfə, kənd təsərrüfatı məhsullarının ümumi həcmi 2,7 dəfə, xalq istehlakı mallarının istehsalı isə 3 dəfə artıb. Təhsil, elm və mədəniyyət sahələrində böyük nailiyyətlər əldə olunub, formalaşmış sosial-iqtisadi və intellektual potensial isə Azərbaycanın gələcək müstəqilliyi üçün mühüm zəmin yaradıb.
Sumqayıt Dövlət Universitetinin Azərbaycan və Şərqi Avropa xalqları tarixi kafedrasının müdiri, professor Şirxan Səlimova çıxışında bildirib ki, Heydər Əliyevin siyasi fəaliyyəti nəticəsində Azərbaycan müstəqilliyin ilk illərində xaos və anarxiyadan xilas olaraq inkişaf və sabitlik yoluna qədəm qoyub. Professor qeyd edib ki, “Əsrin müqaviləsi”nin imzalanması ölkədə siyasi sabitliyin möhkəmlənməsinə və iqtisadi inkişafın sürətlənməsinə ciddi təkan verib. Dünyanın aparıcı şirkətləri ilə bağlanan müqavilələrin Azərbaycanın həm siyasi təhlükəsizliyinin təmin edilməsinə, həm də iqtisadi tərəqqisinə xidmət etdiyini vurğulayan professor bildirib ki, “Şahdəniz” yatağının kəşfi və qaz layihələrinin uğurla həyata keçirilməsi Azərbaycanın beynəlxalq enerji bazarında mövqelərini daha da gücləndirib. Bu gün Azərbaycan iştirakçısı və təşəbbüskarı olduğu beynəlxalq enerji layihələri ilə regional iqtisadi inkişafın aparıcı qüvvəsinə və Avroatlantik məkanın enerji təhlükəsizliyinin təminatçılarından birinə çevrilib.
Konfrans işini plenar iclas və 6 bölmə iclası ilə davam etdirib.