Mayın 8-də Azərbaycan Milli İncəsənət Muzeyində Ümummilli Lider Heydər Əliyevin və görkəmli oftalmoloq-alim, akademik Zərifə Əliyevanın xatirəsinə həsr olunmuş yenilənmiş memorial zalın açılışı olub.
“Tehsil365“ xəbər verir ki, Mədəniyyət Nazirliyi və Azərbaycan Milli İncəsənət Muzeyinin birgə təşkilatçılığı ilə ərsəyə gələn zal Ulu Öndər Heydər Əliyevin və Zərifə Əliyevanın zəngin həyat və fəaliyyət yolunu müasir təqdimat vasitələri ilə əks etdirən ekspozisiya məkanı kimi yenidən qurulub.
Açılışdan əvvəl çıxış edən mədəniyyət nazirinin müavini Səadət Yusifova bildirib ki, Ulu Öndər Heydər Əliyevin və akademik Zərifə Əliyevanın zəngin həyat yolu Azərbaycan tarixində xüsusi yer tutur. O qeyd edib ki, onların fəaliyyəti bu gün və gələcək nəsillər üçün mühüm mənəvi istiqamət rolunu oynayır. Onun sözlərinə görə, bu irsin gənc nəslə çatdırılması dövlətin mədəniyyət siyasətinin əsas prioritetlərindən biridir.
Mədəniyyət nazirinin müavini Murad Hüseynov deyib ki, Azərbaycanın inkişaf tarixində silinməz iz qoymuş Ulu Öndər Heydər Əliyevin və akademik Zərifə Əliyevanın dövlətçilik və ictimai fəaliyyəti ölkəmizin bugünkü uğurlarının əsasını təşkil edir. O vurğulayıb ki, bu irsin qorunması və müasir təqdimat formaları ilə gələcək nəsillərə çatdırılması həm milli yaddaşın yaşadılması, həm də cəmiyyətin mənəvi zənginləşməsi baxımından xüsusi əhəmiyyət daşıyır.
Azərbaycan Milli İncəsənət Muzeyinin direktoru, sənətşünaslıq üzrə fəlsəfə doktoru, dosent Şirin Məlikova çıxışında Ulu Öndərin və akademik Zərifə Əliyevanın həyat yolunun əsl məktəb olduğunu vurğulayıb. Onun sözlərinə görə, bu məktəb həm vətənpərvərlik, həm də insanlığa xidmət nümunəsidir və onların irsinin muzey müstəvisində təqdim olunması bu dəyərlərin daha geniş auditoriyaya çatdırılmasına xidmət edir.
Tədbirdə Milli Məclisin deputatı, parlamentin Mədəniyyət komitəsinin sədri Polad Bülbüloğlu, Xalq rəssamı, akademik Ömər Eldarov və Azərbaycan Rəssamlar İttifaqının sədri, Xalq rəssamı Fərhad Xəlilov bildiriblər ki, Ümummilli Lider Heydər Əliyevin dövlətçilik fəaliyyəti Azərbaycanın müstəqillik yolunda möhkəm təməl yaradıb, mədəniyyət və incəsənət sahəsinə göstərdiyi diqqət isə milli kimliyin qorunmasına böyük töhfə verib. Zərifə Əliyevanın isə elmi fəaliyyəti, xüsusilə oftalmologiya sahəsindəki xidmətləri onun adını Azərbaycan elminin zirvəsinə yazdırıb.
Çıxış edənlər diqqətə çatdırıblar ki, bu cür irsin təbliği və yaşadılması həm mədəni yaddaşın qorunması, həm də cəmiyyətin mənəvi zənginləşməsi baxımından mühüm əhəmiyyət daşıyır. Onların fikrincə, belə tədbirlər gənc nəslin milli dəyərlərə bağlılığının güclənməsinə və tarixi şəxsiyyətlərə ehtiramın artırılmasına xidmət edir.
Tədbir bədii hissə ilə davam edib.
Əməkdar artist, sənətşünaslıq üzrə fəlsəfə doktoru İlham Nəzərov və Xalq artisti, professor Ülviyyə Hacıbəyovanın ifasında Ulu Öndərin sevdiyi Azərbaycan və dünya bəstəkarlarının əsərlərindən ibarət konsert proqramı təqdim olunub.
Sonra qonaqlar Ümummilli Lider Heydər Əliyevin və görkəmli oftalmoloq-alim, akademik Zərifə Əliyevanın xatirəsinə həsr olunmuş memorial zal ilə tanış olublar.
Memorial zalda Azərbaycan təsviri sənətinin görkəmli nümayəndələrinin əsərləri vasitəsilə bu iki böyük şəxsiyyətin həyat və fəaliyyətinə bədii baxış təqdim olunur. Ekspozisiyada Xalq rəssamı, görkəmli heykəltaraş Ömər Eldarovun “Elegiya” (1988–1989) və “Heydər Əliyevin büstü” (2012) əsərləri nümayiş olunur.
Zalda, həmçinin Xalq rəssamı Tahir Salahovun “Ulu Öndər Heydər Əliyevin portreti” (1998), Oqtay Sadıqzadənin “Akademik Zərifə Əliyevanın portreti” (2000) kimi mühüm sənət nümunələri yer alır.
Ekspozisiyanın mühüm hissəsini Ümummilli Liderin Azərbaycan mədəniyyət və incəsənət xadimləri ilə görüşlərini, sərgi və tədbirlərdə iştirakını əks etdirən nadir foto və sənəd materialları təşkil edir. Bu materiallar sırasında onun görkəmli bəstəkar Arif Məlikovun yaradıcılıq gecəsində çıxışı (1995), Xalq rəssamları Toğrul Nərimanbəyov və Maral Rəhmanzadənin sərgilərində iştirakı, eləcə də dünyaşöhrətli musiqiçilər Mstislav Rostropoviç və Qalina Vişnevskaya ilə görüşü kimi tarixi anlar yer alır.
Bundan əlavə, Ümummilli Liderin Azərbaycan incəsənətinin inkişafına göstərdiyi diqqət və qayğını əks etdirən müxtəlif tədbirlərdən görüntülər, o cümlədən görkəmli bəstəkar Qara Qarayevə Dövlət mükafatının təqdim olunması və rəssamlarla görüşləri də ekspozisiyada öz əksini tapıb.
Ziyarətçilərə daha dolğun və interaktiv təqdimat məqsədilə memorial zal iriölçülü monitorlarla təchiz olunub. Bu, qonaqlara foto və videomateriallar, sənədli süjetlər və arxiv görüntüləri ilə tanış olmaq imkanı yaradır.