Tədqiqatçılar Magellan pinqvinlərinin əiştirakı ilə Argentinanın ən ucqar cənub ərazilərində təhlükəli "əbədi kimyəvi maddələr" tapıblar. Bunun üçün mütəxəssislər quşlara su, hava və müxtəlif səthlərdən kimyəvi birləşmələri özünə çəkən xüsusi silikon halqalar taxıblar.
“Tehsil365“ xəbər verir ki, bu məlumatı CNN yayıb.
Kaliforniya Universitetinin vəhşi təbiət üzrə baytarı Ralf Vanstrels bildirib ki, mütəxəssislər ekoloji çirklənmə səviyyəsini yoxlamaq üçün çoxdan fərqli metodlar axtarışında idilər. O, insanların nümunə toplamaq məqsədilə istifadə etdiyi qolbaqlardan yararlanmaq qərarına gəlib. Bu fikrini o, Baffalo Universitetinin tədqiqatçısı Diana Aqa ilə bölüşərək birgə işə başlayıb.
Üç mövsüm davam edən tədqiqatlar zamanı elmi qrup 55 pinqvindən nümunə götürüb. Halqaların 90 faizindən çoxunda bir çox müasir məişət məhsullarında tətbiq edilən sintetik kimyəvi maddələr qrupu - polifüoralkil birləşmələr (PFAS) aşkarlanıb. Yüksək istiliyə dözümlü olan PFAS-ın təbii yolla parçalanması çox çətindir. Bu maddələr xərçəng xəstəliyi də daxil olmaqla, ciddi sağlamlıq problemlərinə yol aça bilir.
PFAS konsentrasiyası yüksək olmasa da, alimlər tərəfindən mütəmadi olaraq qeydə alınıb. Vanstrels vurğulayıb: "Bu fakt göstərir ki, hətta əhalinin az yaşadığı, ən ucqar bölgələrdə belə heyvanlar davamlı olaraq bu cür zərərli maddələrin təsirinə məruz qalırlar".