“Maliyyə savadlılığı məktəblərdə ayrıca fənn kimi və ya iqtisadiyyat fənninin tərkib hissəsi kimi tədris olunmalıdır” .
İqtisadçı Xalid Kərimli “Tehsil365”ə açıqlamasında bildirib ki , əgər məktəblərdə iqtisadiyyat fənni yoxdursa, bu istiqamətdə mütləq yeni dərs proqramı hazırlanmalıdır. Ekspert hesab edir ki, maliyyə savadlılığı insan və cəmiyyət üçün həyati əhəmiyyət daşıyan mövzulardan biridir.
Xalid Kərimli qeyd edib ki, şagirdlərə müxtəlif nəzəri sahələr öyrədildiyi kimi, gündəlik həyatda hər kəsə lazım olan maliyyə bilikləri də aşılanmalıdır:
“Borcun idarə olunması, pulun düzgün xərclənməsi, qənaət vərdişləri, gəlirin əldə olunması və büdcənin planlaşdırılması kimi mövzular məktəblərdə tədris edilməlidir.”
İqtisadçının fikrincə, hər kəs müəyyən elmi sahələrdə mütəxəssis olmur, lakin maliyyə məsələləri ilə hər bir insan gündəlik qarşılaşır:
“Hər kəs zooloq, bioloq və ya başqa ixtisas sahibi olmur. Amma hamımız pula ehtiyac duyuruq, gəlir əldə edirik, xərclərimizi planlaşdırırıq və hesablamalar aparırıq. Buna görə maliyyə savadlılığı hər kəs üçün vacibdir.”
Ekspert vurğulayıb ki, iqtisadi biliklər orta məktəb səviyyəsində mütləq şəkildə fənlərin bir hissəsi kimi yer almalıdır.
Onun sözlərinə görə, bu yanaşma gələcəkdə daha məsuliyyətli və maliyyə baxımından savadlı cəmiyyətin formalaşmasına töhfə verə bilər.