Fəsil dəyişiklikləri orqanizmə birbaşa təsir göstərir. Xüsusilə yaz aylarında havaların isinməsi, allergiyaların artması və qidalanma rejiminin dəyişməsi sağlamlıqla bağlı bəzi problemlərə səbəb ola bilər.
“Tehsil365” xəbər verir ki, mütəxəssislər yaz mövsümündə bir sıra məqamlara diqqət etməyi tövsiyə edir. Bildirilir ki, əgər sağlamlığınızın qayğısına qalmaq istəyirsinizsə, mütləq yeyib-içdiyinizə, vərdişlərinizə fikir verməlisiniz:
Allergiyalara qarşı tədbir görün
Yaz aylarında ən çox rast gəlinən problemlərdən biri mövsümi allergiyalardır. Ağac və çiçək tozları burun axması, asqırıq, göz yaşarması və nəfəs darlığı yarada bilər. Allergiyası olan şəxslərə səhər saatlarında açıq havada az vaxt keçirmək və həkim məsləhəti ilə dərmanlardan istifadə etmək tövsiyə olunur.
Qidalanmanı yüngülləşdirin
Qış aylarında ağır və yağlı qidalar üstünlük təşkil etsə də, yazda daha yüngül qidalanmaq vacibdir. Mövsümi meyvə-tərəvəzlər, göyərti və bol maye qəbulu orqanizmin vitamin ehtiyacını qarşılayır və immuniteti gücləndirir.
Su qəbulunu artırın
Havanın istiləşməsi ilə bədən daha çox maye itirir. Gün ərzində kifayət qədər su içmək həm enerji səviyyəsini qoruyur, həm də maddələr mübadiləsini sürətləndirir.
İmmuniteti gücləndirin
Mövsüm keçidlərində immun sistem zəifləyə bilər. D vitamini, C vitamini və minerallarla zəngin qidalar qəbul etmək, kifayət qədər yatmaq və fiziki aktiv olmaq vacibdir.
Soyuqdəyməyə qarşı diqqətli olun
Yaz aylarında hava dəyişkən olduğu üçün səhər və axşam saatlarında qalın geyinmək tövsiyə edilir. İnsanlar isti havaya aldanaraq nazik geyindikdə soyuqdəymə halları arta bilər.
Fiziki aktivliyi artırın
Yaz gəzmək və idman üçün ən uyğun fəsillərdən biridir. Açıq havada yürüş etmək həm fiziki sağlamlığa, həm də psixoloji vəziyyətə müsbət təsir edir.
Mütəxəssislər bildirirlər ki, düzgün qidalanma, aktiv həyat tərzi və profilaktik tədbirlər yaz aylarını daha sağlam keçirməyə kömək edir.(axsam.az)