Mayın 6-da Azərbaycan Dillər Universitetinin (ADU) Magistratura şöbəsi tərəfindən “Bir liderin izi ilə: Heydər Əliyev və müstəqillik yolu” adlı elmi-maarifləndirici tədbir keçirilib. Tədbirin əsas məqsədi müasir Azərbaycan dövlətçiliyinin banisi, görkəmli dövlət xadimi Heydər Əliyev irsinin müxtəlif istiqamətlər üzrə təhlili və bu irsin gənc nəslə çatdırılması olub.
“Tehsil365” xəbər verir ki, tədbiri giriş sözü ilə İngilis dilinin üslubiyyatı kafedrasının professoru, filologiya elmləri doktoru Aysel Məmmədbəyli açaraq çıxışında Heydər Əliyev siyasi fəaliyyətinin Azərbaycan tarixindəki müstəsna rolunu vurğulayıb. Bildirilib ki, o, yalnız siyasi lider kimi deyil, həm də sistemli dövlətçilik düşüncəsinin və milli ideologiyanın formalaşdırıcısı kimi çıxış edib. Onun uzaqgörən siyasəti nəticəsində ölkədə ictimai-siyasi sabitlik təmin olunub, müstəqil dövlət quruculuğu prosesinin möhkəm təməlləri qoyulub.
Çıxış zamanı qeyd olunub ki, Heydər Əliyev fəaliyyətində xalq amili daim ön planda olub, həyata keçirilən siyasət yalnız bu günün deyil, gələcəyin inkişafını da hədəfləyib. Bu baxımdan, Azərbaycanın beynəlxalq aləmdə qazandığı nüfuz və inkişaf göstəricilərinin həmin strateji kursun nəticəsi olduğu diqqətə çatdırılıb.
Daha sonra Magistratura şöbəsinin Dilşünaslıq ixtisasının 106 və 107-ci qrup tələbələrinin təqdimatları baş tutub. Tələbələr müxtəlif mövzular üzrə hazırladıqları məruzələrlə çıxış edərək Heydər Əliyev çoxşaxəli fəaliyyətini fərqli aspektlərdən təhlil ediblər. Təqdimatlar zamanı ulu öndərin dövlətçilik fəlsəfəsi, milli-mənəvi dəyərlərin qorunması, təhsil, mədəniyyət, iqtisadiyyat və xarici siyasət sahəsində həyata keçirdiyi uğurlu strategiyalar geniş şəkildə işıqlandırılıb. Çıxışlar iştirakçılar tərəfindən maraqla qarşılanıb və mövzular ətrafında fikir mübadiləsi aparılıb.
Tədbirdə Rəna Şabanzadə, Turan Sadıqova, Esmira Atazadə, Ülviyyə Qasımlı, Zülfiyyə Quliyeva, Elmira Ağabalayeva, Lalə Rəcəbli, Zərxanım Vəliyeva və Mövlanə Nuruzadə müxtəlif mövzularda təqdimatlarla çıxış edərək Heydər Əliyev dövlətçilik irsinin ayrı-ayrı istiqamətlərini geniş şəkildə təhlil ediblər.
Magistratura şöbəsinin müdiri, dosent Namiq Əsədov çıxışında vurğulayıb ki, bu cür elmi və maarifləndirici görüşlər gənclərin milli dəyərlərə bağlılığının gücləndirilməsi, tarixi şəxsiyyətlərin irsinin öyrənilməsi və gələcək nəsillərə ötürülməsi baxımından mühüm əhəmiyyət kəsb edir.
