Daşkəsəndə Ümummilli Lider Heydər Əliyevin anadan olmasının 103-cü ildönümü münasibətilə ümumrayon toplantısı keçirilib.
“Tehsil365” in bölgə müxbirinin verdiyi məlumata görə, tədbirdə rayon icra hakimiyyətinin başçısı Orxan Abbasov, Milli Məclisin deputatı Kamran Bayramov, rayonun hüquq-mühafizə orqanlarının, idarə, müəssisə, xidmət sahələrinin rəhbərləri, şəhid ailələrinin üzvləri, qazilər və rayon ictimaiyyətinin nümayəndələri iştirak ediblər.
Əvvəlcə Ümummilli Lider Heydər Əliyevin Daşkəsən şəhərinin mərkəzində ucaldılmış abidəsi ziyarət edilib, əziz xatirəsi ehtiramla anılıb. Ardından tədbir iştirakçıları Daşkəsən rayon Heydər Əliyev Mərkəzində olublar, Ulu Öndərin həyat və fəaliyyətinin müxtəlif dövrlərini özündə əks etdirən fotolara və eksponatlara, həmçinin kitab sərgisinə, yeniyetmə və gənclərin əl işlərinə baxış keçiriblər.
Ümumrayon toplantısı Ümummilli Lider Heydər Əliyevin və şəhidlərimizin əziz xatirəsinin bir dəqiqəlik sükutla yad olunması ilə başlayıb. Çıxışlarda Ulu Öndər Heydər Əliyevin Vətəni və xalqı qarşısında göstərdiyi misilsiz xidmətlərindən bəhs edilib. Vurğulanıb ki, Ulu Öndər Heydər Əliyev dahi şəxsiyyət, uzaqgörən lider, cəsarətli insan idi. O, həyatını doğma xalqına həsr edib, fəaliyyətinin bütün dövrlərində ona ləyaqətlə, sədaqətlə xidmət edib. Azərbaycanın müstəqilliyinin əbədi, dönməz olması, iqtisadi potensialının möhkəmlənməsi, bölgədə və dünyada nüfuzunun artması dahi liderin adı ilə bağlıdır.
Tədbirdə Ulu Öndər Heydər Əliyevin ideyalarının Prezident İlham Əliyev tərəfindən uğurla davam etdirilməsindən, ölkəmizin ərazi bütövlüyünün, suverenliyinin təmin olunmasının yaşatdığı qürurdan da söz açılıb. Sonra Gəncə Dövlət Universitetinin nəzdində Regional Kollecin Qəmbər Hüseynli adına İnstrumental Ansamblının ifasında Ulu Öndər Heydər Əliyevin sevdiyi musiqi əsərlərindən ibarət konsert proqramı təqdim olunub.