Mingəçevir Dövlət Universiteti və Mərkəzi Aran Regional Gənclər və İdman İdarəsinin birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr edilmiş I MDU Yaşıl Kampus İdman Festivalı keçirilib.
“Tehsil365"in verdiyi məlumata görə, gənclər arasında sağlam həyat tərzinin təşviqi, ekoloji mədəniyyətin gücləndirilməsi, yaşıl düşüncə tərzinin formalaşdırılması və dayanıqlı kampus həyatının təşviqi məqsədi daşıyan festival regionun ən genişmiqyaslı yaşıl idman təşəbbüslərindən biri kimi böyük maraqla qarşılanıb. Festivalda Mingəçevir Dövlət Universitetinin akademik və inzibati heyəti, tələbələr, magistrantlar, məzunlar, Mərkəzi Aran Regional Gənclər və İdman İdarəsinin rəhbərliyi, peşəkar və həvəskar idmançılar, tərəfdaş qurumların nümayəndələri, şəhər ictimaiyyəti və media nümayəndələri daxil olmaqla ümumilikdə 3000-dən çox iştirakçı yer alıb.
Festivalın açılış mərasimində MDU-nun Keyfiyyət təminatı və akkreditasiya şöbəsinin müdiri Azad Mirzəbəyov universitetdə həyata keçirilən “Yaşıl Kampus” strategiyasının yalnız ekoloji təşəbbüslərlə məhdudlaşmadığını, eyni zamanda, sağlam həyat tərzi, fiziki aktivlik, sosial rifah və məsuliyyətli vətəndaşlıq dəyərlərini özündə birləşdirən kompleks inkişaf modeli olduğunu diqqətə çatdırıb. Vurğulanıb ki, universitetdə formalaşdırılan müasir kampus mühiti tələbələrin ekoloji düşüncə tərzinin inkişafına, dayanıqlı həyat vərdişlərinin təşviqinə və sağlam cəmiyyət modelinin gücləndirilməsinə xidmət edir.
Mərkəzi Aran Regional Gənclər və İdman İdarəsinin rəisi Azad Gözəlov çıxışında gənclərin idmana marağının artırılması, sağlam həyat tərzinin təşviqi və regionlarda kütləvi idman hərəkatının genişləndirilməsinin dövlət gənclər siyasətinin prioritetlərindən biri olduğunu qeyd edib. O, MDU ilə təşkil olunan belə innovativ və sosial təşəbbüslərin gənclərin fiziki və mənəvi inkişafına mühüm töhfə verdiyini bildirib.
Festival çərçivəsində marafon/qaçış, voleybol, futbol, üzgüçülük, velosiped yarışı, stolüstü tennis və ekoyarışlar təşkil olunub. Yarışlarda universitetin tələbələri, əməkdaşları, məzunları, həmçinin tərəfdaş qurumların nümayəndələri fəal iştirak ediblər. Marafon/qaçış və velosiped yürüşləri Mingəçevirin mərkəzi küçələri boyunca təşkil olunub. Şəhərin yaşıllıq zolaqları və açıq hava marşrutlarını əhatə edən yürüşlər ekoloji məsuliyyət, aktiv şəhər həyatı və karbon emissiyalarının azaldılması ideyalarını təşviq edən nümunəvi ictimai platformaya çevrilib. Xüsusilə diqqətçəkən məqamlardan biri festival iştirakçılarının tədbir məkanına əsasən avtomobilsiz — piyada, velosiped və ictimai nəqliyyat vasitələri ilə gəlməsi olub. Bununla iştirakçılar dayanıqlı mobillik, təmiz nəqliyyat və şəhər mühitində karbon izinin azaldılması ilə bağlı ictimai çağırışa dəstək nümayiş etdiriblər. Festivalın müxtəlif idman yarışları açıq hava və yaşıllıq mühitində təşkil olunub, iştirakçılar üçün ekoloji baxımdan təhlükəsiz və sağlam atmosfer yaradılıb.
Qalib komandalar və fərdi iştirakçılar medal, kubok və xüsusi sertifikatlarla təltif olunublar. Tədbir konsert proqramı və musiqili şoularla davam edib.
Festivalın diqqətçəkən təşəbbüslərindən biri də “Green Nutrition Zone” – Yaşıl Qidalanma Zonasının yaradılması olub. Zonada yerli və mövsümi məhsullar, orqanik qidalar, ekoloji təmiz istehlak nümunələri və plastikdən istifadə olunmayan qablaşdırma həlləri təqdim edilib. Eyni zamanda, “Zero Waste Food” konsepti çərçivəsində qida tullantılarının minimuma endirilməsi, təkrar istifadə və məsuliyyətli istehlak yanaşmaları təşviq olunub.