Mayın 17–22-də Bakıda keçiriləcək Ümumdünya Şəhərsalma Forumunun 13-cü Sessiyası (WUF13) ilə əlaqədar olaraq, ölkə ictimaiyyətinin bu mühüm tədbir barədə məlumatlandırılması məqsədilə respublikamızın müxtəlif şəhərlərində WUF13 Festivalı keçirilir. Quba, Lənkəran, Qəbələ, Şəki, Mingəçevir və Gəncədən sonra festivalın növbəti ünvanı mayın 10-da Xankəndi şəhəri olub.
“Tehsil365" xəbər verir ki, festival çərçivəsində günün birinci yarısında Qarabağ Universitetində WUF13 ilə bağlı məlumatlandırma sessiyası təşkil olunub. Sessiyada universitetin tələbə heyəti və media nümayəndələri iştirak ediblər.
Dövlət Şəhərsalma və Arxitektura Komitəsinin mətbuat katibi Ramiz İdrisoğlu, “WUF13 Azərbaycan” Əməliyyat Şirkətinin məzmun və media əlaqələri üzrə baş meneceri Eldar Rəsulov, Qarabağ Universitetinin tələbələrlə iş mərkəzinin əməkdaşı Gəray Zeynallı çıxış edərək, WUF13 barədə ətraflı məlumat veriblər. Çıxışlarda tədbirin ölkəmiz üçün əhəmiyyəti diqqətə çatdırılıb, müasir şəhərsalma yanaşmaları və bu sahədə beynəlxalq əməkdaşlığın rolundan danışılıb.
Bildirilib ki, müasir şəhərsalma konsepsiyaları məşğulluğun artırılmasına, mobilliyin yaxşılaşdırılmasına və şəhər imkanlarına çıxışın genişlənməsinə mühüm təsir göstərir. Yeni şəhərsalma proqramları, infrastruktur layihələri, genişmiqyaslı quruculuq işləri tikinti və xidmət sahələrində yeni iş yerlərinin açılmasına birbaşa töhfə verir.
Qeyd edilib ki, erməni vandalizmi nəticəsində dağıdılmış Qarabağ və Şərqi Zəngəzur bölgəsində bərpa işləri ilə yanaşı, ərazilər sıfırdan, müasir standartlara uyğun səviyyədə yenidən qurulur. Bu ərazilərdə 8 şəhərin baş planı və 101 kənd və qəsəbənin şəhərsalma əsaslandırılmaları artıq təsdiq edilib. İki şəhərin baş planı aidiyyəti qurumlarla razılaşdırılır, daha iki şəhərin baş planı üzrə işlər yekun mərhələdədir. Həyata keçirilən layihələr sayəsində bu ərazilərdə qlobal trendlərə cavab verən, “ağıllı” şəhər və kənd konsepsiyalarını, bərpaolunan enerji və yaşıl zona yanaşmalarını özündə birləşdirən tam yeni bir ekosistem formalaşdırılır.
Diqqətə çatdırılıb ki, mayın 17-22-də Bakıda keçiriləcək WUF13 hər kəs üçün açıqdır.
Sonra iştirakçıları maraqlandıran suallar cavablandırılıb.
“WUF13 Azərbaycan” Əməliyyat Şirkətinin məzmun və media əlaqələri üzrə baş meneceri Eldar Rəsulov jurnalistlərə müsahibəsində bildirib ki, Ümumdünya Şəhərsalma Forumunun 13-cü Sessiyasında iştirak etmək üçün 178 ölkədən 30 mindən çox iştirakçı qeydiyyatdan keçib. Geniş ictimaiyyətin tədbir haqqında daha geniş məlumatlandırılması məqsədilə Azərbaycanın bölgələrində WUF13 Festivalları keçirilir. Bu günə kimi keçirilən festivallara 80 minə yaxın iştirakçı cəlb olunub.
Qeyd edək ki, iki hissədən ibarət WUF13 Festivalı axşam saat 18:00-da Xankəndi şəhərindəki Zəfər meydanında keçiriləcək ictimai proqramlarla davam edəcək.