Yunanıstan hökuməti süni intellektlə bağlı müddəaların ölkə Konstitusiyasına daxil edilməsini nəzərdən keçirir.
“Tehsil365“ xəbər verir ki, təşəbbüsün əsas məqsədi texnologiyanın insan maraqlarına və demokratik dəyərlərə xidmət etməsini təmin etməkdir.
Yunanıstanın Baş naziri Kiriakos Mitsotakis parlamentdə çıxışı zamanı bildirib ki, süni intellekt insan azadlıqlarını və cəmiyyətin rifahını qorumağa xidmət etməli, eyni zamanda, mümkün risklər nəzarətdə saxlanmalıdır. Onun sözlərinə görə, gələcək nəsillərin təhlükəsizliyi baxımından texnologiyanın inkişafı hüquqi çərçivələrlə müşayiət olunmalıdır.
Məlumatda vurğulanır ki, Yunanıstan hökuməti demokratik institutların qorunması və rəqəmsal təhlükəsizlik məsələlərini Konstitusiya dəyişikliklərinin əsas istiqamətlərindən biri hesab edir. Təklif olunan dəyişikliklərə görə, süni intellektin tətbiqi zamanı insan hüquqları, fərdi azadlıqlar və dövlət nəzarəti prinsipləri qorunmalıdır.
Rəsmi Afina bu addımla Avropada süni intellektin hüquqi tənzimlənməsi istiqamətində öncül ölkələrdən birinə çevrilməyə çalışır.
Analitiklər hesab edirlər ki, texnologiyanın sürətli inkişafı fonunda dövlətlərin konstitusiya səviyyəsində yeni mexanizmlər hazırlaması yaxın illərdə daha geniş yayılacaq tendensiyaya çevrilə bilər.