Azərbaycan Dillər Universitetinin (ADU) Filologiya fakültəsinin nəzdində Xarici dillərin tədrisi metodikası kafedrasının baş müəllimi Gülxar Hüseynovanın rəhbərliyi ilə Y.Mirzəyev adına 44 nömrəli tam orta məktəbdə pedaqoji təcrübə keçən IV kurs tələbələrinin iştirakı ilə “Heydər Əliyevin anadan olmasının 103-cü ildönümü”nə həsr olunmuş elmi-mədəni tədbir keçirilib.
“Tehsil365” xəbər verir ki, tədbirdə Filologiya fakültəsinin müəllim heyəti, Xarici dillərin tədrisi metodikası kafedrasının əməkdaşları – baş müəllimlər R.Həsənova, İ.Bəylərova, pedaqoji elmlər üzrə fəlsəfə doktoru, dosent J.Mehrəliyeva, həmçinin İngilis-Alman dilləri fakültəsindən filologiya elmləri doktoru, dosent X.Əsgərova iştirak ediblər.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra təcrübəçi tələbələrin və məktəb şagirdlərinin hazırladıqları bədii kompozisiyalar, təqdimatlar, eləcə də Azərbaycan və alman dillərində səsləndirilən çıxışlar iştirakçılar tərəfindən böyük maraqla qarşılanıb.
Tədbirin əsas məqsədlərindən biri gənclərə vətənpərvərlik ruhunun aşılanması, Azərbaycançılıq ideologiyasının təbliği və Ümummilli Lider Heydər Əliyevin zəngin siyasi irsinin gələcək nəsillərə çatdırılması olub.
Tədbirdə çıxış edən məktəbin direktor səlahiyyətlərini icra edən N.Hüseynova vətənpərvərlik ruhunda təşkil olunan bu cür maarifləndirici tədbirlərin şagirdlərin dünyagörüşünün formalaşmasında mühüm rol oynadığını vurğulayıb. O, tədbirin yüksək səviyyədə təşkilinə görə müəllim və şagird heyətinə təşəkkürünü bildirib, iştirakçıların hazırlıq səviyyəsini xüsusi qeyd edib.
N.Hüseynova çıxışında Ümummilli Lider Heydər Əliyevin dövlətçilik irsinin gənc nəslə aşılanmasının əhəmiyyətindən bəhs edib, şagirdlərə gələcək təhsil həyatlarında uğurlar arzulayıb.
Tədbirin yekun hissəsində Alman dili müəllimi G.Qarayeva çıxış edərək tədbirin təşkilində əməyi olan bütün iştirakçılara təşəkkürünü bildirib. O, xüsusilə şagirdlərin yüksək hazırlıq səviyyəsini, yaradıcı yanaşmasını və Azərbaycan–Alman dillərində təqdim olunan çıxışların tədbirə xüsusi rəng qatdığını qeyd edib.
Sonda Alman dili müəllimi G.Qarayeva tədbirdə fəal iştirak edən şagirdlərə sertifikatlar təqdim edib, onların fəaliyyətini yüksək qiymətləndirib.
