Görkəmli Azərbaycan yazıçısı, nasir və kinodramaturq Maqsud İbrahimbəyov milli ədəbiyyat və kino sənətinin inkişafında mühüm xidmətləri ilə yadda qalıb.
“Tehsil365” xəbər verir ki, O, 1935-ci il mayın 11-də Bakı şəhərində anadan olub.
Maqsud İbrahimbəyov uzun illər ərzində həm ədəbi, həm də ictimai fəaliyyət sahəsində fəallıq göstərib. 1964-cü ildən Azərbaycan Yazıçılar Birliyinin üzvü olan yazıçı bir sıra məşhur əsərlərin və film ssenarilərinin müəllifi kimi tanınıb. O, 1998-ci ildə “Azərbaycan Respublikasının xalq yazıçısı” fəxri adına layiq görülüb.
Yazıçı müxtəlif illərdə Azərbaycan Respublikası Milli Məclisinin deputatı seçilib, həmçinin Azərbaycan Respublikası Sülh Komitəsinin sədri, PEN klubunun prezidenti və Azərbaycan Respublikası Əsilzadələr Məclisinin sədri kimi fəaliyyət göstərib. O, ABŞ-nin Luiziana ştatının fəxri senatoru və Minneapolis şəhərinin fəxri vətəndaşı adına da layiq görülüb.
Maqsud İbrahimbəyov “Şöhrət”, “İstiqlal” və “Şərəf” ordenləri ilə təltif olunub. O, həmçinin xalq yazıçısı Rüstəm İbrahimbəyovun böyük qardaşı idi.
Azərbaycan mədəniyyətinin görkəmli simalarından biri olan Maqsud İbrahimbəyov 2016-cı il martın 22-də Bakı şəhərində vəfat edib.