Azərbaycan təsviri sənətinin görkəmli nümayəndələrindən olan Salam Salamzadə həm yaradıcılığı, həm də ictimai fəaliyyəti ilə ölkənin mədəniyyət tarixində mühüm iz qoyub.
“Tehsil365” xəbər verir ki, Onun əsərləri Azərbaycan rəssamlıq məktəbinin dəyərli nümunələri sırasında yer alır.
Salam Əbdülqasım oğlu Salamzadə 1908-ci ildə Bakıda anadan olub. Uzun illər ərzində təsviri sənətin müxtəlif sahələrində fəaliyyət göstərən rəssam özünəməxsus üslubu və zəngin yaradıcılığı ilə tanınıb.
O, 1940-cı ildə “Azərbaycan SSR əməkdar incəsənət xadimi”, 1982-ci ildə isə “Azərbaycan SSR xalq rəssamı” fəxri adına layiq görülüb. Yaradıcılığı dövründə Bakıda, Moskvada və Kiyevdə fərdi sərgiləri təşkil olunub. Onun əsərləri yalnız Azərbaycanda deyil, xarici ölkələrin muzey, qalereya və şəxsi kolleksiyalarında da qorunur.
Salam Salamzadə ictimai və mədəni fəaliyyətlə də məşğul olub. O, müxtəlif illərdə Azərbaycan Milli İncəsənət Muzeyi və Nizami Gəncəvi adına Azərbaycan Ədəbiyyatı Muzeyinin direktoru vəzifələrində çalışıb.
Hazırda rəssamın 72 əsəri Azərbaycan Dövlət Rəsm Qalereyasının fondunda saxlanılır. Salam Salamzadə 12 may 1997-ci ildə Bakıda vəfat edib. Onun yaradıcılığı Azərbaycan təsviri sənətinin dəyərli irslərindən biri kimi yaşamaqdadır.