Azərbaycan Dillər Universitetinin (ADU) mini-futbol komandası Ulu Öndər Heydər Əliyevin anadan olmasının 103-cü ildönümünə həsr olunmuş mini-futbol turnirinin qalibi olub. Bu münasibətlə universitetin rektoru, akademik Kamal Abdulla komanda üzvləri ilə görüş keçirib.
“Tehsil365” xəbər verir ki, görüşdə ADU İdman Klubunun müdiri Yusif Abbasəliyev, məşqçi müəllim Şahin Şahhüseyni, assistent Ləman İsmayılova da iştirak ediblər.
Qeyd edək ki, mini-futbol turniri 15, 16, 17 və 20 aprel tarixlərində Nəsimi Rayon İcra Hakimiyyəti, Bakı Şəhər Gənclər və İdman İdarəsi və YAP Nəsimi rayon təşkilatının birgə təşkilatçılığı ilə keçirilib. Turnirdə ATU, AzMİ, Nəsimi Rayon Polis İdarəsi, Nəsimi Bələdiyyəsi, Nəsimi YAP, ADNSU, MKTB Qazilər və ADU-nun mini-futbol komandaları mübarizə aparıblar. ADU komandası yarış ərzində Nəsimi Rayon Polis İdarəsi, Nəsimi Bələdiyyəsi, AzMİ və MKTB Qazilər komandaları üzərində qələbə qazanaraq turnirin qalibi olub.
Mükafatlandırma mərasimi 159 nömrəli tam orta məktəbin mini-futbol meydançasında təşkil olunub. Tədbirdə Nəsimi Rayon İcra Hakimiyyətinin birinci müavini Gülarə Verdiyeva, Nəsimi rayon YAP təşkilatının sədri Azər Süleymanov, Nəsimi Rayon Gənclər və İdman İdarəsinin əməkdaşı Sirac Axundov və digər qonaqlar iştirak edərək qaliblərə mükafatlar təqdim ediblər.
