Mayın 7-də Azərbaycan Dillər Universiteti-nin Filologiya fakültəsinin nəzdində fəaliyyət göstərən İngilis dilinin üslubiyyatı kafedrası tərəfindən Filologiya fakültəsində tədris olunan “Öyrənilən əsas dil”, “İxtisas dili” və “Xarici dildə işgüzar və akademik kommunikasiya” fənləri üzrə istifadə olunan dərsliyin yenilənməsi məqsədilə “Roadmap” dərsliyinin təqdimat mərasimi keçirilib.
“Tehsil365” xəbər verir ki, tədbirdə Filologiya fakültəsinin dekanı Aynur Budaqova, dekan müavini İlahə Əliyeva, İngilis dilinin üslubiyyatı kafedrasının müdiri Aytən Hacıyeva, Xarici dillərin tədrisi metodikası kafedrasının müdiri Sevinc Hüseynova, Avropa dilləri kafedrasının müdiri Şəmsinur Aslanova, Keyfiyyətin təminatı və monitorinq şöbəsinin nümayəndəsi, eləcə də kafedra əməkdaşları iştirak ediblər.
Təqdimat İngilis dilinin üslubiyyatı kafedrasının baş müəllimi, filologiya üzrə fəlsəfə doktoru Səbinə Nurəliyeva tərəfindən aparılıb. O, yeni dərslik haqqında ətraflı məlumat verib, onun struktur və məzmun xüsusiyyətlərini iştirakçıların diqqətinə çatdırıb.
Tədbir çərçivəsində “Roadmap” dərsliyinə dair rəsmi videoçarx nümayiş etdirilib və daha sonra müəllim heyəti ilə geniş müzakirələr aparılıb. Müzakirələr zamanı dərsliyin tədris prosesində tətbiqi, səviyyələr üzrə uyğunluğu və effektivliyi barədə fikir mübadiləsi aparılıb.
