Azərbaycanın tibbi nəşrlər mühitində mühüm boşluğu dolduracaq yeni vəsait – əczaçı-provizor və fitoterapevt Rövşən Cəlilovun "Təbiətin gizli hikməti" kitabı oxucuların ixtiyarına verilib.
Bu barədə “Tehsil365"ə məlumat verən kitabın redaktoru və ön söz müəllifi, professor Almaz Ülvi Binnətova nəşri bir ömrün biliyinin və zəhmətinin məhsulu kimi qiymətləndirib. Qeyd edib ki, nəşr müəllifin 50 illik peşəkar tibbi fəaliyyəti, zəngin müşahidələri və xalq təbabəti ənənələrini elmi əsaslarla birləşdirən mühüm bir bələdçidir.
Kitabın əsas məzmununu müasir tibbin imkanları ilə bitkilərlə müalicənin (fitoterapiya) elmi vəhdəti, dərman bitkilərinin düzgün toplanması, saxlanılması və hazırlanması qaydaları təşkil edir.
Bitki adlarının ilk dəfə olaraq dörd dildə (Azərbaycan, latın, rus və türk) təqdim edilməsi, orqanizmin təmizlənməsi (detoks), immun sisteminin gücləndirilməsi və vitaminlərin rolu barədə geniş məlumatlar da kitabın əsas üstünlüyüdür.
Rəyçi, əczaçılıq elmləri doktoru, professor Məhbubə Vəliyeva isə vurğulayır ki, bu əsər Azərbaycan dilində sistemli fitoterapiyanın nəzəri və praktik əsaslarını açıqlayan ilk mənbələrdən biridir.
Müəllif Rövşən Cəlilov kitabda oxucuları kor-koranə müalicədən çəkindirərək, təbiətin nemətlərindən həkim məsləhəti ilə, elmi şəkildə yararlanmağa çağırır.
Nəşr həm tibb işçiləri və tələbələr, həm də sağlam həyat tərzi ilə maraqlanan geniş oxucu kütləsi üçün nəzərdə tutulub.