Azərbaycan professional musiqisinin ən parlaq nümayəndələrindən biri olan Qara Əbülfəz oğlu Qarayev 1918-ci il fevralın 5-də Bakıda anadan olub.
“Tehsil365” xəbər verir ki, O, bəstəkar, pedaqoq və ictimai xadim kimi Azərbaycan musiqi mədəniyyətinin inkişafında mühüm rol oynayıb.
Qara Qarayev yaradıcılığı boyunca simfonik əsərlər, baletlər, operalar və kino musiqiləri bəstələyərək geniş şöhrət qazanıb. Onun əsərləri milli musiqi ənənələri ilə müasir bəstəkarlıq üslubunun uğurlu vəhdəti kimi qiymətləndirilir.
Sənətkar fəaliyyətinə görə bir sıra yüksək fəxri ad və mükafatlara layiq görülüb. O, 1958-ci ildə “Azərbaycan SSR xalq artisti”, 1959-cu ildə isə “SSRİ xalq artisti” adına layiq görülüb. Həmçinin Stalin və “Lenin” mükafatlarının laureatı olub, 1978-ci ildə isə Sosialist Əməyi Qəhrəmanı adına layiq görülüb.
Qara Əbülfəz oğlu Qarayev uzun illər pedaqoji fəaliyyət göstərərək Azərbaycan bəstəkarlıq məktəbinin formalaşmasına böyük töhfə verib. O, eyni zamanda SSRİ Ali Sovetinin deputatı və Azərbaycan Milli Elmlər Akademiyasının akademiki kimi də fəaliyyət göstərib.
Görkəmli bəstəkar 1982-ci il mayın 13-də Moskvada vəfat edib. Onun zəngin yaradıcılığı Azərbaycan musiqi xəzinəsinin ən qiymətli nümunələri sırasında yer alır.