Azərbaycan Dillər Universitetinin (ADU) Təhsildə Xarici Dillər kafedrasının təşkilatçılığı ilə ADU-da fəaliyyət göstərən Qərbi Azərbaycan Mərkəzində Ümummilli Lider Heydər Əliyevin anadan olmasının 103-cü ildönümünə həsr olunmuş dəyirmi masa keçirilib. Tədbirdə rektor müşaviri A.Osmanlı, İngilis və alman dilləri fakültəsinin dekanı N.Camalzadə, İngilis və fransız dilləri fakültəsinin dekanı V.Babayeva, Təhsil fakültəsinin dekan müavini S. Rüstəmova, kafedra əməkdaşları və tələbələr iştirak ediblər.
“Tehsil365” xəbər verir ki, tədbir Azərbaycan Respublikasının Dövlət Himninin səsləndirilməsi ilə başladı, daha sonra Ümummilli Lider H.Əliyevin xatirəsi bir dəqiqəlik sükutla yad edilib.
Tədbirin açılış nitqi ilə kafedra müdiri dos. H.Hacıyeva çıxış edərək bildirib ki, Heydər Əliyev Azərbaycan dövlətçiliyinin möhkəmləndirilməsi, milli-mənəvi dəyərlərin qorunması və ölkənin beynəlxalq nüfuzunun artırılması istiqamətində misilsiz xidmətlər göstərib. O qeyd edib ki, Ulu Öndərin uzaqgörən siyasəti nəticəsində Azərbaycanın müstəqilliyi daha da möhkəmlənib, ictimai-siyasi sabitlik təmin olunub və ölkənin inkişaf strategiyasının əsas təməlləri formalaşdırılıb. H.Hacıyeva həmçinin vurğulayıb ki, Heydər Əliyevin zəngin siyasi irsi bu gün də gənc nəslin vətənpərvərlik ruhunda formalaşmasında mühüm rol oynayır.
Rektorun müşaviri A.Osmanlı tədbirin məhz Qərbi Azərbaycan Mərkəzində keçirilməsini təqdirəlayiq hal kimi dəyərləndirərək bildirib ki, Heydər Əliyev bütün fəaliyyəti dövründə Qərbi Azərbaycandan olan soydaşlarımızın hüquqlarının qorunmasını, onların tarixi yaddaşının yaşadılmasını və milli kimliklərinin gələcək nəsillərə ötürülməsini daim diqqət mərkəzində saxlayıb. O vurğulayıb ki, Ulu Öndərin formalaşdırdığı dövlətçilik siyasətində tarixi həqiqətlərin beynəlxalq müstəviyə çatdırılması mühüm istiqamətlərdən biri olub və bu siyasi xətt bu gün də uğurla davam etdirilir.
Daha sonra isə kafedranın dosenti S.Nuriyev “H.Əliyev və neft strategiyası”, fil.f.d., b/m. S.Rəcəbova “H.Əliyev və təhsil”, müəllim İ.Bayramova “H.Əliyev və Azərbaycan dili”, laborant G.Əmirova isə “H.Əliyev və mədəniyyət siyasəti” mövzusunda çıxış ediblər.
Tədbirin gedişatında H.Əliyevin həyatı və fəaliyyət dövründən bəhs edən videoçarx nümayiş etdirilib, onun dəyərli çıxışlarından nitqlər və H.Əliyevin adına bəstələnmiş mahnılar səsləndirilib.
