Bakı Mühəndislik Universitetində (BMU) Azərbaycan dili və pedaqogika və Ümumi fənlər kafedralarının birgə təşkilatçılığı ilə Birinci Türkoloji Qurultayın 100 illiyinə həsr olunmuş “Azərbaycan, özbək dil və mədəniyyəti əlaqələri” mövzusunda elmi seminar keçirilib. Seminarda Daşkənd Dövlət Özbək Dili və Ədəbiyyatı Universitetinin alimləri, BMU-nun professor-müəllim heyəti və tələbələri iştirak ediblər.
BMU-dan “Tehsil365” ə bildirilib ki, tədbirin açılışında Azərbaycan dili və pedaqogika kafedrasının müdiri Təranə Hacıyeva Bakıda keçirilmiş Birinci Türkoloji Qurultayın türk xalqlarının ortaq mədəni və elmi yaddaşında mühüm yer tutduğunu bildirib. O, qurultayın yalnız elmi hadisə deyil, həm də türk xalqlarının dil və mədəni birliyini təşviq edən əlamətdar təşəbbüs olduğunu vurğulayıb. Eyni zamanda, qurultayın türk dillərinin inkişafı, qarşılıqlı yaxınlaşması və ortaq elmi platformanın formalaşmasında mühüm rol oynadığı diqqətə çatdırılıb. Bu cür seminarların isə Azərbaycan-özbək elmi-mədəni əlaqələrinin daha da möhkəmlənməsinə töhfə verdiyi qeyd olunub.
Ümumi fənlər kafedrasının müdiri Hümeyrə Mustafayeva seminarın Azərbaycan və Özbəkistan arasında elmi-mədəni əlaqələrin inkişafına, ortaq türk mədəni irsinin daha yaxından öyrənilməsinə xidmət etdiyini vurğulayıb.
Sonra Daşkənd Dövlət Özbək Dili və Ədəbiyyatı Universitetinin Özbək dili və ədəbiyyatı kafedrasının müdiri Saodat Muhamedova “Özbək və Azərbaycan dillərində sevgi bildirən dil vahidləri” mövzusunda məruzə ilə çıxış edib. Məruzədə hər iki dildə əzizləmə, oxşama ifadə edən söz və ifadələrin fonetik, leksik, sintaktik və morfoloji xüsusiyyətləri müqayisəli şəkildə təhlil olunub.
Seminarda, həmçinin universitetin alimləri Xurşida Kadirova “Özbək və Azərbaycan dillərində atalar sözlərinin tipologiyası”, Tolqin Toğayev isə “Rus dilindəki bəzi türk (özbək) alınmaları haqqında” mövzularında məruzələr təqdim ediblər. Məruzələrdə Azərbaycan və özbək dillərindəki atalar sözlərinin tematik və semantik uyğunluqları, milli-mədəni xüsusiyyətləri əks etdirməsi barədə ətraflı məlumat verilib. Eyni zamanda, rus dilində işlənən bəzi türk mənşəli sözlərin yaranma və işlənmə xüsusiyyətlərinə toxunulub.
İnteraktiv formatda keçirilən seminarda iştirakçıların sualları cavablandırılıb, məruzələr ətrafında müzakirələr aparılıb.
Tədbirin davamında BMU-nun kimya mühəndisliyi ixtisasının I kurs tələbəsi Şövkət Kərimov Türk dünyasının böyük söz ustadları Nizami Gəncəvi və Əlişir Nəvainin yaradıcılığından bədii nümunələr səsləndirib.