Fransa-Azərbaycan Universitetinin məzunu və kompüter elmləri üzrə mühazirəçisi Yusif İbrahimli “Sosial mediada psixi pozuntuların aşkarlanması üçün izah edilə bilən süni intellekt: sorğu və perspektiv” mövzusunda tədqiqat aparıb. Tədqiqat sosial media məlumatları əsasında psixi pozuntuların aşkarlanması sahəsində tətbiq olunan süni intellekt yanaşmalarının sistemli və hərtərəfli təhlilini təqdim edir.
“Tehsil365" xəbər verir ki, Yusif İbrahimli AZƏRTAC-a açıqlamasında bildirib ki, sosial media platformaları istifadəçilərin emosional və psixoloji vəziyyətini əks etdirən mühüm məlumat mənbəyi kimi çıxış edir. Bu məlumatların süni intellekt vasitəsilə təhlili əqli sağlamlıq problemlərinin erkən mərhələdə müəyyənləşdirilməsi və dəstək mexanizmlərinin gücləndirilməsi baxımından mühüm potensiala malikdir.
Araşdırmada qeyd olunur ki, müasir süni intellekt sistemləri bir çox hallarda qərarların necə formalaşdığını tam şəkildə izah etmir. Bu isə həkim və mütəxəssislərin həmin nəticələrə etibar etməsini çətinləşdirir. Məhz buna görə tədqiqatda qərarların daha aydın və anlaşıqlı formada təqdim edilməsini təmin edən izah edilə bilən süni intellekt (XAI) yanaşmalarına xüsusi diqqət ayrılıb.
Elmi işdə izah edilə bilən və şərh oluna bilən modellər, post-hoc izah metodları, diqqət mexanizmləri, qrafəsaslı yanaşmalar, eləcə də böyük dil modellərinə (LLM) əsaslanan yeni nəsil izah üsulları geniş şəkildə təhlil edilir. Bununla yanaşı, sosial mediaəsaslı psixi pozuntuların aşkarlanmasında istifadə olunan əsas məlumat bazaları və qiymətləndirmə metodları da müqayisəli şəkildə araşdırılıb.
Tədqiqatda sahənin aktual problemləri — məlumat məhdudiyyətləri, modellərdə mümkün qərəzlilik, etik məsələlər və klinik baxımdan mənalı izahatların əldə olunmasının çətinliyi xüsusi vurğulanır. Müəllif, eyni zamanda, gələcək elmi araşdırmalar üçün potensial istiqamətlər və tətbiq perspektivlərini təqdim edir.