“Bir çox insanlar bu gün sağlam qidalanma deyərkən, ən çox satılan qida məhsullarının etiket məlumatlarını oxumamaq, onların tərkibi ilə bağlı maraqlanmamaqla yanaşı, daha çox kalori miqdarına fikir verirlər.”
Bu sözləri “Tehsil365” ə açıqlamasında , qida eksperti Məhsəti Hüseynova bildirib.
“Burada da kalori miqdarını hesablayarkən balanslaşmanı nəzərdən qaçırırlar. Çünki kalori miqdarı, tutaq ki, bir insan gün ərzində 1500–2000 kalori qəbul etməlidirsə, bu hər bir insana görə təbii ki, dəyişir. Bu kalori miqdarını qəbul etdiyi bir qidadan almaq onun üçün faydalı hesab olunmur. Bu, balanslı karbohidratlar, yağlar, zülallar və vitamin-minerallar dərəcəsində nisbətlə hesablanmalıdır.Gün ərzində qəbul etdiyi qidada, tutaq ki, kişilər 30–35 qram, qadınlar 20–25 qram şəkər qəbul etməlidirsə, bu şəkərin, bu karbohidrat miqdarının hamısını şəkərdən, şəkər məhsullarından, unlu məmulatlardan, qazlı, rəngli, şəkərli içkilərdən deyil, daha çox meyvələrdən, quru meyvələrdən, paxlalılardan da almalıdır ki, bu balansı düzgün hesablasın. Eyni zamanda, bir çox insanlar səhər yeməyini qəbul etmirlər ki, bu da yanlış bilinən məqamlardandır. Çünki gün ərzində səhər yeməyini qəbul etməyən insanlar digər yemək zamanlarında normal qida qəbulundan 30–40% daha artıq qida qəbul etməyə meyilli olurlar və bu da onların çəkisinin artmasına, gün ərzində yorğunluğa və diqqətin yayınmasına, əzginliyə gətirib çıxarır.Bir məqam isə satışda olan “şəkərsiz”, “diet”, “fit”, “light” kimi məhsullara kor-koranə inanmaqdır. Bu məhsullarda yağ miqdarı az olsa da, dadlandırıcı olaraq kimyəvi maddələrdən istifadə olunur. Eləcə də şəkərsiz olsa da, tərkibində kimyəvi qatqı maddəsi kimi aspartam istifadə olunursa, bu daha zərərlidir və insan orqanizmində tam düzgün həzm olunmur, zamanla qaraciyər və böyrək problemlərinə gətirib çıxara bilər. Bu məqamlara da diqqət etmək lazımdır.Ən çox rast gəlinən yanlışlardan biri gec saatlarda ağır qida qəbuludur. Bəzən düşünürlər ki, əgər axşam hər hansı bir məclisdə çox yeyiblərsə, səhər az yeməklə bunu tənzimləyəcəklər. Bu, heç də belə deyil. Yaxşı olar ki, axşam saatlarında, xüsusilə yatmazdan əvvəl yağlı, qızartma və ağır qidalar qəbul edilməsin. Bu da mədə-bağırsaq problemlərinə və artıq çəkiyə gətirib çıxara bilər.Bir çox hallarda su qəbulu da unudulur. Bu, orqanizmdə susuzluqla yanaşı, daxili orqanların funksiyasının pozulmasına, metabolizmin zəifləməsinə və bağırsaq sağlamlığının pisləşməsinə səbəb olur. Ona görə də gün ərzində insan orqanizmi hər kiloqram çəkiyə görə 0,30 litr su qəbul etməlidir. Bu suya təmiz su, ayran və meyvələrin tərkibindəki maye də daxildir.Sağlam qidalanmanın vazkeçilməzlərindən biri mövsümi meyvə-tərəvəzlərdir. Bəzən insanlar düşünür ki, əgər faydalıdırsa, bundan istədiyi qədər yeyə bilər. Bu da yanlış fikirdir. Faydalı olsa da, meyvə-tərəvəzin tərkibində müəyyən miqdarda şəkər var. Ona görə də miqdarı aşmamaq lazımdır. Şirin meyvələr günün birinci yarısında, neytral, az şirin və turş meyvələr isə günün ikinci yarısında yeyilsə, daha faydalı hesab olunur.Bir çoxları sağlam qidalanmanın çox baha olduğunu düşünür, bu da tamamilə yanlışdır. Orta hesabla sağlam qida hesab olunan məhsullar düzgün seçilərsə və gündəlik qəbul miqdarı düzgün tənzimlənərsə, bu heç də baha deyil. Sadəcə balans, porsiyaya nəzarət, məhsulun tərkibi ilə bağlı məlumatları araşdırmaq və sağlam qidalanmanı həyat tərzinə çevirmək lazımdır.”