Elm və Təhsil Nazirliyi və Mədəniyyət Nazirliyinin dəstəyi, Bakı Müasir Musiqi Cəmiyyətinin təşkilatçılığı ilə mayın 18-dən 24-dək “4-cü Bakı Müasir Musiqi Günləri” Festivalı keçiriləcək.
“Tehsil365" xəbər verir ki, növbəti dəfə müasir musiqi sahəsində fəaliyyət göstərən yerli və xarici bəstəkar və ifaçılar bir araya gələcək. Builki festivalın da missiyası ölkəmizin dünya müasir musiqi həyatında təmsilini gücləndirməkdir.
Festivalda proqrama daxil olan XX-XXI əsr bəstəkarlarının əsərlərini həm yerli musiqi kollektivləri “Cadenza” orkestri, BCMS ansamblı, solistlər, həm də nüfuzlu müasir musiqi ansamblları olan “Catinblack”, “C2E2 Ensemble”, eləcə də müxtəlif ölkələrdən dəvət olunmuş ifaçı solistlər və məruzəçilər – Szilard Benes, Aleksey Potapov, Raçel Valker və b. ifa edəcək.
Festival proqramı səhər, günorta, axşam seanslarından ibarətdir və ictimaiyyətə açıqdır. Proqram çərçivəsində Beynəlxalq Muğam Mərkəzi, Azərbaycan Musiqi Mədəniyyəti Dövlət Muzeyi, Muzey Mərkəzi, Qara Qarayevin ev-muzeyi kimi aparıcı konsert zallarında həm peşəkar musiqiçilər, həm də müasir musiqi ilə maraqlanan hər kəs üçün açıq olan vörkşoplar, mühazirələr, eləcə də axşam konsertləri keçiriləcək.
Proqram dünya premyeraları da daxil olmaqla, 40-a yaxın əsəri əhatə edir. İfa olunacaq bəzi əsərlər xüsusi olaraq bu festival üçün yazılmışdır. Bakı Müasir Musiqi Günləri Festivalının son günündə ənənəvi olaraq Azərbaycan dilində subtitrlərlə hazırlanmış nüfuzlu dünya bəstəkarlarından biri olan Morton Feldman haqqında film nümayişi olacaq. Bu tədbirə giriş üçün əvvəldən qeydiyyat tələb olunur.
Festival haqqında daha ətrafı məlumatı rəsmi internet saytından və sosial şəbəkə hesablarından əldə etmək olar.