“Yeni viruslarla bağlı xəbərlərin insanlarda qorxu və təşviş yaratmasının əsas səbəbi onların təhlükə kimi qəbul edilməsidir”.
Psixoloq Nabat Mirzəyeva “Tehsil365”ə açıqlamasında bildirib ki, insan beyni naməlum və nəzarət edilməsi çətin vəziyyətlərə qarşı həssas reaksiya verir:
“Virus kimi görünməyən, sürətlə yayılan və nəticələri bilinməyən təhlükələr beyində avtomatik olaraq risk siqnalı yaradır. İnsan düşünür ki, nə baş verəcək, necə olacaq, bu vəziyyət nə ilə nəticələnəcək.”
Psixoloq qeyd edib ki, COVID-19 pandemiyası dövründə yaşanan stress və itkilər insanların psixologiyasında iz buraxıb:
“Yeni virus xəbərləri yayıldıqda insanlar istər-istəməz əvvəlki qorxu və təşviş hisslərini yenidən xatırlayırlar.”
Nabat Mirzəyeva sosial medianın da bu prosesə təsir etdiyini vurğulayıb:
“İnsan beyni neqativ xəbərlərə daha həssasdır. Sosial mediada davamlı şəkildə yayılan qorxuducu məlumatlar və neqativ fikirlər təşvişi daha da artırır.”
Onun fikrincə, əsas narahatlıqlardan biri insanların özləri və yaxınları ilə bağlı düşüncələridir:
“İnsanlar ‘mənə və ailəmə nə olacaq?’, ‘yenidən pandemiya yaşanacaqmı?’ kimi suallar verməyə başlayırlar. Bu isə qeyri-müəyyənlik hissini gücləndirir.”
Psixoloq bildirib ki, məlumatlı olmaqla təşviş içində yaşamaq eyni anlayış deyil:
“Xəbərləri izləmək və məlumat almaq vacibdir. Amma insan özünü davamlı qorxu içində saxlamamalıdır. Uzunmüddətli qorxu həm psixoloji, həm də fiziki sağlamlığa mənfi təsir göstərir.”
Sonda ekspert informasiya ilə emosional balansın qorunmasının vacibliyini qeyd edib:
“Qorxu ilə məlumat arasında düzgün balans qurmaq psixoloji sağlamlıq üçün olduqca önəmlidir.”