“Hantaviruslar ötən əsrin ortalarından etibarən araşdırılmağa başlanıb və onların əsas təbii daşıyıcıları gəmiricilər, xüsusilə siçanlardır”.
Tibb eksperti Adil Qeybulla “Tehsil365”ə açıqlamasında bildirib, virus əsasən gəmiricilərin ifrazatları vasitəsilə ətrafa yayılır və insanlara yoluxa bilir:
“Siçanların sidiyi, nəcisi və digər ifrazatları ilə çirklənmiş mühitdə virus havaya qarışaraq nəfəs yolları vasitəsilə insana keçə bilər. Xüsusilə fermalar, anbarlar, limanlar və gəmilər bu baxımdan riskli yerlər hesab olunur.”
Ekspert qeyd edib ki, hantavirusların bəzi növləri daha çox Şimali və Cənubi Amerikada müşahidə olunur. Lakin beynəlxalq daşımalar və logistika əlaqələri səbəbindən risk müxtəlif ölkələr üçün aktual olaraq qalır.
Adil Qeybulla vurğulayıb ki, virusun yeni ştamları ilə bağlı narahatlıq ciddi yanaşılmalı mövzudur:
“Əgər virusun insandan insana keçə bilən formaları ortaya çıxarsa, bu, təhlükəni daha da artırır. Çünki zoonotik, yəni heyvan mənşəli virusların davranışı zamanla dəyişə və mutasiyaya uğraya bilər.”
Onun sözlərinə görə, hantavirus insanlarda ağır fəsadlara səbəb ola bilər:
“Bu infeksiya bəzi hallarda yüksək hərarət, güclü ağrılar, böyrək çatışmazlığı, ürək-damar problemləri və hemorragik qızdırma kimi ağırlaşmalar yarada bilir.”
Ekspert bildirib ki, beynəlxalq səhiyyə qurumlarının məsələ ilə bağlı xəbərdarlıqları məntiqlidir:
“Belə viruslarla bağlı erkən xəbərdarlıq və nəzarət tədbirləri vacibdir. Çünki təhlükənin qarşısını vaxtında almaq sonradan nəticələrlə mübarizədən daha effektivdir.”
Adil Qeybulla əlavə edib ki, Azərbaycan üçün də ehtiyatlı olmaq vacibdir:
“Qlobal nəqliyyat və ticarət əlaqələri fonunda risk tamamilə istisna edilə bilməz. Buna görə sanitariya, nəzarət və maarifləndirmə tədbirləri gücləndirilməlidir.”