Azərbaycan Respublikasının Gənclər Fondu gənclər təşkilatları və gənclər üçün inkişaf, innovasiya və sosial təşəbbüslər üzrə qrant müsabiqəsi elan edib.
“Tehsil365” xəbər verir ki, müsabiqənin əsas məqsədi dövlət gənclər siyasətinin prioritetlərinə uyğun olaraq gənclərin və gənclər təşkilatlarının potensialının inkişaf etdirilməsi, onların sosial, iqtisadi, mədəni və ictimai həyatda fəal iştirakının təşviqi, innovativ və ictimai faydalı təşəbbüslərinin dəstəklənməsidir. Eyni zamanda layihələrin gənclərin milli-mənəvi dəyərlərə sadiq, vətənpərvər, yaradıcı və sosial məsuliyyətli fərdlər kimi formalaşmasına töhfə verməsi nəzərdə tutulur.
Müsabiqədə Azərbaycan vətəndaşı olan 18-29 yaş arası gənclər və gənclər təşkilatları iştirak edə bilərlər. Layihə təklifləri mayın 22-dən iyunun 22-dək qəbul olunacaq. Müraciətlər yalnız Fondun rəsmi saytının E-Xidmətlər Sistemi vasitəsilə elektron qaydada təqdim edilməlidir.
Qrant müsabiqəsinə təqdim olunan layihələr aşağıdakı istiqamətləri əhatə edir:
milli kimlik, vətənpərvərlik və dəyər əsaslı inkişaf;
gənclərin inkişafı və insan kapitalının gücləndirilməsi;
sosial inklüzivlik və bərabər imkanların təşviqi;
rəqəmsal gələcək, innovasiya və süni intellekt;
yaradıcı sənaye və mədəni innovasiyalar;
regionlarda gənclərin iştirakçılığı və ictimai fəallığı;
dayanıqlı inkişaf və ekoloji məsuliyyət.
Müraciət zamanı layihənin təsviri, xərclər smetası və ilkin tədbirlər planı hazırlanaraq sistemə yüklənməlidir. Hər bir müraciətçi yalnız bir layihə təqdim etmək hüququna malikdir.
Layihələrin icra müddəti minimum 3 ay, maksimum 12 ay müəyyən edilib. Fiziki şəxslərin fərdi layihələri üzrə müraciət məbləği 5 min manatdan, gənclər təşkilatlarının yerli layihələri üzrə 10 min manatdan, beynəlxalq layihələr üzrə isə 15 min manatdan çox olmamalıdır.
Bildirilib ki, digər qurumlar tərəfindən tam maliyyələşdirilmiş, icrası davam edən və ya artıq başa çatmış layihələr Fond tərəfindən əlavə və ya təkrar maliyyələşdirilməyəcək.
Layihələrin qiymətləndirilməsi zamanı yenilik və unikal yanaşma, davamlılıq, təklif olunan müddət və büdcə çərçivəsində reallaşdırılma imkanları, həmçinin müasir texnoloji həllər və innovativ yanaşmalara uyğunluq əsas meyarlar kimi nəzərə alınacaq.
Qrant müsabiqəsi haqqında ətraflı məlumatı youthfoundation.az� vasitəsilə əldə etmək mümkündür.