Azərbaycan xalqının tarixində müstəqillik uğrunda mübarizə xüsusi yer tutur. Xalqımız əsrlər boyu azad və suveren dövlət qurmaq arzusu ilə yaşamış, bu amal uğrunda böyük sınaqlardan keçmişdir. 1918-ci ildə Azərbaycan Xalq Cümhuriyyətinin yaradılması milli dövlətçilik tariximizin ən mühüm hadisələrindən biri olsa da, həmin müstəqillik uzunömürlü olmadı. Lakin xalqın azadlıq iradəsi heç zaman sarsılmadı və 1991-ci ildə Azərbaycan yenidən dövlət müstəqilliyini bərpa etdi.
Müstəqilliyin ilk illərində ölkədə baş verən siyasi qeyri-sabitlik, iqtisadi böhran və xarici təhdidlər dövlətçiliyin gələcəyini təhlükə altına salmışdı. Belə mürəkkəb bir dövrdə xalqın tələbi ilə hakimiyyətə qayıdan Ümummilli Lider Heydər Əliyev Azərbaycanı dərin böhrandan çıxararaq dövlət müstəqilliyinin qorunması istiqamətində mühüm addımlar atdı. Onun uzaqgörən siyasəti nəticəsində ölkədə ictimai-siyasi sabitlik təmin edildi, dövlət idarəçiliyi gücləndirildi və milli həmrəylik mühiti formalaşdırıldı.
Heydər Əliyev daim vurğulayırdı ki, müstəqilliyi qazanmaq qədər onu qorumaq da mühüm və məsuliyyətli vəzifədir. Məhz bu siyasi iradə nəticəsində Azərbaycan beynəlxalq aləmdə etibarlı tərəfdaş kimi tanınmağa başladı, ölkənin müstəqil siyasət yürütmək imkanları genişləndi. Dövlətçilik ənənələrinin möhkəmləndirilməsi, milli maraqların qorunması və xalq-iqtidar birliyinin təmin olunması Azərbaycanın inkişaf yolunun əsas istiqamətlərinə çevrildi.
Bu gün Prezident İlham Əliyev tərəfindən həmin siyasi kurs uğurla davam etdirilir. Dövlət başçısının həyata keçirdiyi məqsədyönlü siyasət nəticəsində Azərbaycan regionun ən güclü dövlətlərindən birinə çevrilmişdir. Ölkədə həyata keçirilən genişmiqyaslı sosial-iqtisadi layihələr, ordu quruculuğu və beynəlxalq münasibətlərdə əldə olunan uğurlar müstəqilliyin daha da möhkəmlənməsinə xidmət edir.
Müasir dövrdə Azərbaycanın əldə etdiyi uğurlar göstərir ki, müstəqilliyin qorunmasının əsas dayaqları güclü liderlik, milli birlik və xalqın dövlətinə olan sarsılmaz inamıdır. Azərbaycan xalqı bu dəyərlərə sadiq qalaraq gələcəyə inamla addımlayır, dövlət müstəqilliyini daha da möhkəmləndirmək istiqamətində əzmlə fəaliyyət göstərir.
Azərbaycan Dövlət Pedaqoji Universitetinin müəllimi, gənc alim
Osman Azadoğlu