15 İyun Azərbaycan xalqının taleyində mühüm dönüş nöqtəsi, dövlətçilik tariximizin ən əlamətdar günlərindən biridir. Bu tarix Milli Qurtuluş Günü kimi qeyd olunur və Ümummilli Lider Heydər Əliyevin xalqın tələbi ilə siyasi hakimiyyətə qayıdışı ilə bağlıdır. Məhz bu qayıdış Azərbaycan dövlətçiliyinin qorunmasına, ölkədə sabitliyin bərpasına və gələcək inkişafın əsaslarının yaradılmasına imkan vermişdir. 1990-cı illərin əvvəllərində Azərbaycan mürəkkəb ictimai-siyasi proseslərlə üz-üzə qalmışdı. Müstəqilliyini yenicə bərpa etmiş ölkədə siyasi qarşıdurmalar, iqtisadi böhran və hərbi uğursuzluqlar dövlətçiliyin gələcəyini ciddi təhlükə altına salmışdı.
1993-cü ilin iyun hadisələri isə vəziyyəti daha da gərginləşdirmiş, ölkədə vətəndaş qarşıdurması təhlükəsi yaratmışdı. Belə bir şəraitdə xalqın təkidli tələbi ilə Ulu Öndər Heydər Əliyev Bakıya dəvət olundu və dövlət idarəçiliyində məsuliyyətli missiyanı öz üzərinə götürdü.1993-cü il iyunun 15-də Heydər Əliyev Azərbaycan Respublikası Ali Sovetinin sədri seçildi. Bu hadisə ölkənin siyasi həyatında yeni mərhələnin başlanğıcı oldu. Sonrakı dövrdə sabitliyin təmin edilməsi, qanunçuluğun möhkəmləndirilməsi və dövlət institutlarının formalaşdırılması istiqamətində mühüm addımlar atıldı. Məhz buna görə 15 İyun Azərbaycan tarixində Milli Qurtuluş Günü kimi əbədiləşdirildi.
Ümummilli Lider Heydər Əliyevin rəhbərliyi ilə həyata keçirilən siyasət nəticəsində ölkədə ictimai-siyasi sabitlik təmin olundu, iqtisadi islahatlara başlanıldı və Azərbaycanın beynəlxalq mövqeyi möhkəmləndi. 1994-cü ildə imzalanan Əsrin Müqaviləsi Azərbaycanın iqtisadi inkişafında yeni mərhələ açdı, ölkəyə xarici investisiyaların cəlb olunmasına və milli iqtisadiyyatın güclənməsinə şərait yaratdı. Milli Qurtuluş ideyaları bu gün də müasir Azərbaycanın inkişaf strategiyasının əsasını təşkil edir. Ulu Öndərin müəyyən etdiyi siyasi kurs Prezident İlham Əliyev tərəfindən uğurla davam etdirilir. Azərbaycanın əldə etdiyi sosial-iqtisadi nailiyyətlər, beynəlxalq nüfuzunun artması və ərazi bütövlüyünün təmin olunması bu siyasətin nəticələrindən hesab edilir. Milli Qurtuluş Günü Azərbaycan xalqının dövlətçilik ənənələrinə sədaqətinin, milli həmrəyliyinin və güclü liderlik amilinin təntənəsidir. Bu gün təkcə tarixi hadisənin xatirəsi deyil, həm də müstəqil Azərbaycan dövlətinin keçdiyi inkişaf yolunun, əldə etdiyi uğurların və gələcək hədəflərinin simvoludur. Heydər Əliyevin adı Azərbaycan dövlətçiliyinin qorunması və möhkəmləndirilməsi ilə ayrılmaz şəkildə bağlıdır və onun siyasi irsi ölkənin inkişafında mühüm rol oynamaqda davam edir.
Gülöyşə Azadqızı
Azərbaycan Dövlət Pedaqoji Universitetinin müəllimi, gənc alim