“Məhərrəm ayı Qurani-Kərimdə birbaşa adı zikr edilməsə də, ondan bəhs olunan aylar arasındadır. Qurani-Kərimdə haram aylar olaraq bildirilən aylar arasında Məhərrəm ayı da yer alır”.
İlahiyyatçı Cəmil Musayev "Tehsil365"ə açıqlamasında bildirib ki, Peyğəmbərimiz Hz. Məhəmməd (s.ə.s.) Məhərrəm ayını "Allahın ayı" adlandırıb və bu ayın dinimizdə böyük yeri var. "Peyğəmbərimiz Hz. Məhəmməd Məkkədən Mədinəyə hicrət etdikdən sonra Aşura günü yəhudilərin oruc tutduğunu görür və onlardan soruşur: 'Aşura günü nə üçün oruc tutursunuz?' Onlar isə bunun Hz. Musanın Fironun zülmündən qurtulduğu gün olduğunu bildirirlər. Bundan sonra Peyğəmbərimiz 'Mən Musaya sizdən daha yaxınam, o mənim peyğəmbər qardaşımdır', – deyə buyurur və səhabələrinə Aşura günü oruc tutmağı tövsiyə edir."
Musayev qeyd edib ki, dinimizə görə Aşura orucu yəhudilərə bənzəməmək üçün Məhərrəm ayının 9-10, 10-11 və ya 9-10-11-ci günlərində tutulmalıdır. "Ramazan orucu fərz buyurulduqdan sonra isə Peyğəmbərimiz Aşura orucu haqqında 'İstəyən tutsun, istəyən tutmasın', – deyə buyurmuşdur."
İlahiyyatçının sözlərinə görə, Məhərrəm ayı İslam tarixində Kərbəla faciəsi ilə də yadda qalıb. "Aşura günü – Məhərrəm ayının onuncu günü Peyğəmbər əfəndimizin nəvəsi Hz. Hüseyn (r.a.) və onun ailəsi Kərbəlada şəhid edilmişdir. Kərbəla hadisəsi yaşandığı gündən etibarən İslam dünyasının qəlbində sağalmayan bir yara olaraq qalmaqdadır."
Musayev sonda bütün şəhidlərin ehtiramla yad edilməsinin vacibliyini vurğulayıb. "Bu vəsilə ilə İslam uğrunda, din uğrunda, Vətən uğrunda, bayraq uğrunda canlarından keçmiş bütün şəhidləri rəhmətlə yad edirik. Allah səhabələr və Kərbəla şəhidləri başda olmaqla bütün şəhidlərə rəhmət eləsin."