Abşeron rayonu Masazır kənd 3 nömrəli tam orta məktəbin 10-cu sinif şagirdi Hüseynli Əyyar Təyyar oğlunun atası, ilahiyyatçı Hacı Təyyar Hüseynli övladına qarşı sinif rəhbəri tərəfindən qərəzli münasibət göstərildiyini iddia edir.
Abşeron rayonu Masazır kənd 3 nömrəli tam orta məktəbin 10-cu sinif şagirdi Hüseynli Əyyar Təyyar oğlunun atası, ilahiyyatçı Hacı Təyyar Hüseynli "Tehsil365" İnformasiya Agentliyinə müraciət edərək övladına qarşı məktəbdə qərəzli münasibət göstərildiyini iddia edib.
İlahiyyatçı Hacı Təyyar Hüseynlinin sözlərinə görə, "Oğlum Hüseynli Əyyar Təyyar oğlu 2009-cu il təvəllüdlüdür. Abşeron rayon Masazır kənd 3 saylı orta məktəbin 10-cu sinifində oxumalı idi. Niyə 'oxumalı idi' dedim, çünki sentyabr ayından, təhsil ilinin birinci günündən sinif rəhbəri Namazova Gülşən müəllimə, Azərbaycan dili və ədəbiyyat müəlliməsidir, oğluma dedi ki, sən niyə 10-cu sinifdə oxumalısan ki. Hətta məktəb direktorunu da bu işə cəlb edib ki, niyə 10-cu sinifdə oxuyur. Məsələ budur ki, oğlumun oxuduğu sinfi bölüblər. 4 nəfər də uşaq bu müəllimənin sinfinə yönəlib. Onlardan biri qız, üçü oğlandır, oğlanlardan biri də mənim oğlumdur."
Şikayətçinin sözlərinə görə, "Mənim oğlum da zəif nəticəylə 9-cu sinifi keçmişdi, buna baxmayaraq, o peşəkar milli komandanın tərkibində məşqlərə qatılır, güləşçidir. 16 yaşı olmasına baxmayaraq yer tutması asan məsələ deyil. 5 ildir bu işlə məşğul olur, 2 dəfə Respublika çempionatına qədər yüksəlib, mərhələlər keçib. Mən düşünürəm ki, kifayət qədər tanınmış bir idmançıdır. Təhsil ocağı düşünürəm ki, gələcəyin faydalı və istedadlı gənci olaraq dəstəkləməlidir."
Təyyar Hüseynli bildirib ki, "Bu müəllimin bu paxıllığı nə məqsədlədirsə, eqoist və hiyləgərcəsinə incidir, bizi narahat edir. Oğlum deyir ki, başqa uşaqları yox, elə məni çağırır, 7-ci saata qədər saxlayır. Axırda biz təngə gəldik. Hətta oğlum bildirib ki, bir gün məktəbə getdim, gördüm ki, bizimlə birlikdə bu sinfə bölünən qızın da saçlarını yolur. Bu nə anormallıqdır, bilmirəm. Mənim həyat yoldaşım, qızım da getdilər məktəb direktorunun qəbuluna ikinci dəfə də. Dedilər ki, biz bu uşağı sinifdən çıxardaq, o müəllimə iyrənc qərəz aparır. Müəllim səlahiyyətlərində sui-istifadə edir. Yeniyetmələrə psixoloji təsir edə bilər. Mən düşünürəm ki, həmin bölünən bu dörd uşağı sinfindən qovmaq istəyir, amma bu yolla."
Şikayətçi qeyd edib ki, "Məktəb direktoru qəbuluna gedən ailəmə də bu sözləri bildirib ki, bu gün ikinci ailədir ki, gəlib Gülşən müəllimədən şikayət edir. Bütün bu danışıqların bir təsiri olmadı."
Onun sözlərinə görə, "Sinifdə BSQ yazılır, müəllimə qayıdıb deyir ki, sən niyə bunu yaxşı yazmısan, sən zəifsən axı. Mən sənə 2 yazacağam. Bu adam narsistdir deyə düşünürəm. Müəllimə daha sonra uşağı verib polisə, deyirlər ki, siz uşağı təhsildən yayındırırsınız. Bildirdim ki, biz ailəlikcə bu Gülşən müəllimənin əlindən bezmişik. Tək mən deyil, ondan başqa 3 uşaq da bu sinfə verilib və eyni vəziyyətdir. Polis bildirdi ki, bunun üçün sübutunuz varmı. Bildirdim ki, biz ailəlikcə dəfələrlə məktəbə gedib-gəlmişik bu məsələ ilə bağlı. Mən məsələni sahə rəisinə bildirdim."
Təyyar Hüseynli iddia edib ki, "Uşaqlardan biri hətta eşidib ki, müəllimə bildirib ki, mən Əyyarı sinifdən rədd edəcəyəm. Bu adam dili ilə iyrənc hərəkətlərlə belə edir. Bu səbəblərə görə mən uşağı 3 ay məktəbdən saxladım ki, müəllimənin acı sözlərinə qarşı övladım səhv hərəkət etməsin."
Şikayətçinin sözlərinə görə, "Direktor müavini zəng vurub bildirdi ki, Əyyar sinifdə qaldı, məktəbdən çıxardırıq. Bundan sonra mən qaynar xəttə zəng vurdum, Təhsil Nazirliyinin mətbuat katibi olub Səbuhi bəyin də nömrəsini tapdım və ona yazdım. Mən bildirdim ki, müəllimin qərəzli şəkildə uşağı 9-cu sinifdə saxlaması çox qəddarcasına bir məsələdir."
Sonda ilahiyyatçı bildirib ki, "Bu müəllim və məktəb direktoruna mən bu məsələni heç bir formada izah edə bilmədim. Bu da son sözümdür ki, mənim böyük oğlum Kəlbəcərdə hərbi qulluqda olub, çoxdan bitirib o məktəbi. O müəllimə bu oğluma da götürüb 2 yazıb. Sinif rəhbəri də bildirib ki, bütün qiymətlər 4, 5-dir, bu ikini kim yazıb? Oğlum deyib Gülşən müəllimə. Bunun kimi məsələlərə də direktor heç bir tədbir görmür."
Qeyd: Yazıda yer alan iddialar şikayətçi Hacı Təyyar Hüseynlinin "Tehsil365" İnformasiya Agentliyinə təqdim etdiyi məlumatlar əsasında dərc olunur. Qarşı tərəfin mövqeyini dərc etməyə hazırıq.