“Sosial şəbəkələrin gənclərə təsiri mövzusunu 2 mövqedən açıqlamaq olar. İlk olaraq dünyamızı və Azərbaycan gəncliyini sosial şəbəkələrsiz təsəvvür etmək mümkün deyil".
Bu fikirləri "Tehsil365" ə açıqlamasında psixoloq Mələk Kərimova deyib.
Psixoloq bildirib ki, elə bir dövrdə yaşayırıq ki, bizim üçün texnologiya, süni intellektin inkişafı kimi sahələrdə bacarıqlara sahib olan gənclərə ehtiyac var.
"Elə bir dövrdə yaşayırıq ki, bizim üçün texnologiya, süni intellektin inkişafı kimi sahələrdə bacarıqlara sahib olan gənclərə ehtiyac var. Sosial şəbəkələrin müsbət tərəflərinə gənclərin sosiallaşmasını, texnologiyalardan istifadəsini, öz şəxsi kimliyini və yaradıcılığını aid etmək olar".
Onun sözlərinə görə, sosial şəbəkələr bəzən gənclərə mənfi təsir edə bilər.
"Digər tərəfdən gənclər elə bir mərhələdə olur ki, sosial şəbəkələr onlara mənfi təsir göstərə bilir. Çünki gənclər çox vaxt öz həyatlarını, başqa insanların həyatı ilə müqayisə edirlər. Bu yaşam tərzi və ya xarici görünüş ola bilər. Bu müqayisə onların özlərini yetərsiz və dəyərsiz hiss etmələrinə səbəb ola bilir. Dünyadan, ailələrindən, ətrafından gözləntiləri hədsiz dərəcədə arta bilir. Əslində hər görülən kontentin məzmunu gerçəkçi olmaya bilir.
Sosial şəbəkələrin gənclərin psixologiyasına təsiri məsələsində əsasən gənclərin hansı məqsədlə və hansı müddətdə bu şəbəkəni istifadə etdiyi və həyatına necə təsir etdiyi məsələlərinə baxmaq zəruridir. Gənclər öz münasibətlləri, peşəkar və şəxsi inkişaflarına təsir edəcək araşdırmalar edirsə, bacarıqlarını inkişaf etdirirsə, uyğun insanlarla əlaqə qurub dostluqlarını artırırsa,həyat funksionallığı müsbətdirsə sosial şəbəkənin zərərli bir təsiri olmayacaq".
Psixoloq vurğulayıb ki, təhlil etmə qabiliyyəti zəif olan, özünü tək hiss edən, uyğun olmayan sosial qruplara qoşulan, özünü başqaları ilə müqayisə edən gənclər üçün sosial şəbəkələr təhlükə halına gələ bilər.
"Digər tərəfdən təhlil etmə qabiliyyəti zəif olan, özünü tək hiss edən, uyğun olmayan sosial qruplara qoşulan, özünü başqaları ilə müqayisə edən gənclər üçün sosial şəbəkələr təhlükə halına gələ bilər. Hətta hər hansı blogger həmin gənclərin rol modeli belə ola bilər. Özlərini onlara bənzətmə istəyi yarana bilər. Bu da gənclərin kimi izlədiyindən, məqsədinin nə olduğundan, sosial şəbəkədə keçirdiyi vaxtın nə qədər məna qatdlğı ilə əlaqədardır".
"Qeyd etmək lazımdır ki, gənclər bəzən bir-birlərinə qarşı kiber şiddət tətbiq edirlər. Hər hansı məzmunun bütün kütləyə açıq olması bu kimi problemlərə gətirib çıxarır. Kiber şiddətə məruz qalan gənc üçün cəmiyyət tərəfindən reaksiyaların mənfi olması təbii ki, heç də asand deyil və bununla mübarizə aparmaq çətindir. Belə situasiyalarda gənclər depresiyaya düşə və təşviş yaşaya bilərlər ki, bu da diqqət etməli olacağımız məsələlərdən biridir.” - deyə Mələk Kərimova qeyd edib